Deputetja demokrate Jorida Tabaku pretendon se ekziston një raport kofidencial i Bankës së Shqipërisë, ku sipas saj provohet pastrimi i parave në ndërtim, përfshirë dhe rastin e kullave te teatri.
“Raporti që ka bërë departamenti i mbikëqyrjes në Bankën e Shqipërisë provon katërcipërisht atë që opozita ka theksuar gjatë një viti, pastrimin e parave”, u shpreh znj. Tabaku, së cilës iu miratua kërkësa për paraqitje në komision të Guvernatorit Sejko.
Sipa saj, është sektori i ndërtimit fusha ku po pastrohen paratë dhe për këtë citoi raportin e pretenduar konfidencial të Bankës së Shqipërisë që thoshte se “në disa raste nuk disponohen dokumente që provojnë burimin e fondeve, të cilat kryesisht mbeten në nivel deklaratash për transaksione të kryera nga klientët”.
Kryetari i komisionit, z.Braçe zgjodhi ta kalonte me të qeshur akuzën e koleges demokrate me pretendimin e kundërt se nuk ka ndonjë raport të tillë.
Përgjithësisht, akuzave të opozitës se bumi i ndërtimeve në një ekonomi në krizë ku ndodhet vendi shpjegohet vetëm me pastrim parash, qeveria i është përgjigjur duke iu referuar rrugëve bankare, që sipas saj e hedhin poshtë këtë pretendim. /tesheshi.com/
