Deputetja socialiste e qytetit të Shkodrës, Mimoza Hafizi, duket se kohët e fundit ka “tradhtuar” liderin aktual të partisë së saj dhe ka mbështetur fuqishëm kandidaturën e kolegut Ben Blushi, i cili synon të zejë postin e kreut të Partisë Socialiste.
Vetë Hafizi është shprehur se bashkohet me Ben Blushin sa i takon respektimit dhe zbatimit të statutit të Partisë Socialiste e normave themelore të qenies bashkë në këtë grupim të madh politik.
“I kam ofruar mbështetje në rrugëtimin dhe platformën për Kongresin e ardhshëm të Partisë. Do mundohem të përcjell në këtë dokument dhe në aspiratat tona për të ardhmen e partisë ku bëjmë pjesë, të gjithë përvojën e punës sime shumëvjeçare me strukturat socialiste të Tiranës e Shkodrës, zërin kritik të socialistëve shkodranë, analizat e përgjegjshmërisë qeverisëse deri në nivel bazë dhe reflektimet për një frymë të re bashkëpunimi e respekti. Mirëpres çdo sugjerim, besoj që kauza e një partie të madhe nuk i përket vetëm anëtarëve të saj, por çdo qytetari”,- shkruan Hafizi në postimin e saj në Facebook. /tesheshi.com/
