Sipas LDK-së së Isa Mustafës, qeveria e udhëhequr nga Ramush Haradinaj do rrëzohet shumë shpejt dhe pa angazhimin e opozitës.
Deputetja e kësaj partie, Hykmete Bajrami thotë se qeveria aktuale është duke qëndruar në “këmbë të qelqit”, dhe sipas saj vendimet e marra në baza politike, mungesa e kuorumeve në seanca e komisione janë disa nga arsyet pse duhet të mbahen sa më shpejt zgjedhjet nacionale.
“Se sa është Qeveria e fuqishme besoj që e tregojnë numrat e saj, kemi një qeveri e cila qëndron në ‘këmbë të qelqta’, ka vetëm 61 numra kuorumet asnjëherë nuk bëhen nga partitë e koalicionit në seancë ashtu edhe në komisionet funksionale kuorumet janë shumë të vështira për tu bërë, siç raportohet ka probleme në mes të partnerëve të koalicionit”, ka thënë Bajrami për “Ekonomia Online”.
Ajo thotë se çështja nuk është vetëm te numrat, por edhe nga mënyra si janë marrë vendimet të cilat sipas saj janë të pastra politike dhe janë për xhepat e klasës politike e cila janë në qeveri.
“Numri enorm i zëvendësministrave, vendimi për ngritjen e pagave, shpërndarja pa kurrfarë kriteri i mjeteve nga rezervat shtetërore besoj që janë disa nga indikacionet që na tregojnë se sa më shpejtë që kjo qeveri të shkoj dhe të mbahen zgjedhjet të lira dhe demokratike janë më mirë për qytetarët e Republikës së Kosovës duke mos folur ma tej për temat e mëdha të cilat e presin këtë qeveri. Në bazë të kauzave për këto tema të mëdha këta kanë ardhur në pushtete dhe nuk po mund t’i adresojnë besoj që nuk ka me pas shumë nevojë për angazhim të opozitës do të jenë pikërisht këta të cilët do e rrëzojnë vetveten”, thotë Bajrami. /tesheshi.com/
