Deputeti demokrat, Gent Strazimiri, ka dorëzuar armën e tij, e cila iu fotografua në brez gjatë një proteste tek parku i Liqenit, e për të cilën u trazua politika shqiptare dy ditët e fundit. Kjo u bë me dije nga ministri i Rendit, Saimir Tahiri:
“Lajmi i mirë është që Strazimiri e dorëzoi sot pistoletën. Të paktën nuk vazhdon të jetë në paligjshmëri dhe shpresoj të na kursejë në të ardhmen, ai dhe e gjithë çeta, skenat e tubimeve ku dhunohen punonjësit e policisë dhe ku deputetët mbajnë armë me vete. Të gjithë deputetët dhe funksionarët të dorëzojnë armët. Nuk na duhen deputetët me armë, ligji parashikon mbajtjen e armës vetëm kur janë të rrezikuar”, tha Tahiri.
Me këtë akt të Strazimirit, konfirmohet përfundimisht fakti se ajo që është shfaqur në ijen e deputetit demokrat dy ditë më parë, ka qenë pistoletë dhe jo këllëf celulari, siç tha sekretari i përgjithshëm demokrat, Arben Ristani.
Ndërsa kreu demokrat Basha, hodhi dyshimin se fotoja mund të ketë qenë e montuar.
Por pavarërisht aktit të dorëzimit të pistoletës, rasti i Strazimirit do përbëjë tashmë një precedent të ri për ligjin e dekriminalizimit dhe debatit politik mbi të në lidhje me zbatueshmërinë në praktikë. /tesheshi.com/
