Edhe pse i biri ka përfunduar në burg për dhunën ndaj një femre, njëherësh duke trazuar politikën e shoqërine me treguesit e tij socialë të nuancuara me krimi, deputeti socialist Rrahman Rraja nuk pranon të largohet nga grupi parlamentar i PS-së.
Edhe pse nuk ia ka kërkuar kush zyrtarisht nga partia e tij, gazetarët që i janë drejtuar me mikrofona kanë aluduar se ai duhet ta bëjë këtë akt moral. Por jo! E ndër të tjera, është vënë në mbrojtje të të birit.
“Djali im nuk e ka rrahur…. Nuk largohem nga grupi…”, kanë qenë fjalët pëshpëritëse të deputetit Rraja, thënë nxitimthi e sipër për t’iu shmangur ballafaqimit me gazetarët. Këtë të hënë, ai u shfaq krejt normalisht në mbledhjen e grupit, edhe pse sensorët e politikës e opinionit janë kthyer kah ai, për shkak të të birit.
Rrexhep Rraja u arrestua një ditë më parë pas një urdhër-arresti të Prokurorisë së Krujës, nën akuzën e dhunimit të një vajze. Por çështja ka marrë përmasa ta tjera, pas disa të dhënave kompromentuese që tregojnë se ai mund të jetë favorizuar nga organet ligjzbatuese, për shkak të të qënit djalë i një deputeti. /tesheshi.com/
