Intervistoi: Blendi Gashi
Deputeti i Lëvizjes ‘Vetëvendosje’, Ismajl Kurteshi është paraqitur në Manifestimin për Republikën, që opozita e ka mbajtur në Gjilan, anipse ka masën “arrestit shtëpiak”.
Portali mbarëkombëtar, tesheshi.com ka realizuar një intervistë me deputetin Kurteshi i cili ka treguar pse ka vendosur të marrë pjesë në manifestim edhe pse nuk e ka pasur të lejuar një gjë të tillë.
Kurteshi, ju morët pjesë në manifestimin që u mbajt në Gjilan, edhe pse jeni në “arrest shtëpiak”. Pse vepruar kështu kur dihet se pas këtij veprimi masa ndaj jush mund të ndryshojë?
Kjo ka qenë ftesë e mijëra qytetarëve të Gjilanit dhe ftesa e ndërgjegjes sime që të mos heq dorë nga përpjekje për ta mbrojtur Republikën.
Nuk kam marrë leje për të dalë në manifestim dhe jam i gatshëm t’i bartë pasojat për këtë veprim që unë e konsideroj shumë të drejtë, edhe pse gjygjësia mund ta konsideron ndryshe.
Unë pakënaqësitë e mija i shprehi në çdo moment dhe nga çdo pozitë që jam, sepse kjo është detyrë e imja në radhë të parë si qytetar i Kosovës dhe pastaj si deputet jam betuar që do të punoj për interesat e këtij vendi për sovranitetin dhe integritetin territorial. Kështu që nuk është vetëm një formë për të protestuar por vazhdimisht do të jem në protestë derisa këta qeveritarë të papërgjegjshëm të heqin dorë nga këto dy marrëveshje që jam të dëmshme për Kosovën.
Pra, unë do të protestoj në mënyrën time në çdo moment dhe nuk është shumë me rëndësi si të do të protestoj unë, por shumë me rëndësi është që ata që po protestojnë, qytetarët e Gjilanit dhe krejt Kosovës, që çdo ditë e më shumë po rritet numri i tyre dhe ajo është garancioni i vetëm se Republika do të mbrohet.
Kosovën Republikë e bëjnë qytetarët e Kosovës, dhe reagimi qytetarë nuk do të lejoj që Republika të zhbëhet nga udhëheqës të papërgjegjshëm të cilët janë nënshtruar vullnetit të Serbisë t’i realizojnë projektet e tyre.
Kjo që po ndodh në mes të qeveritarëve dhe opozitës është vetëm një ndarje për projektet e Serbisë. Derisa, dy udhëheqësit kryesorë të ekzekutivit të vendit janë bërë avokat të prjekteve të Serbisë, opozita së bashku me qytetarët po i kundërshtojnë këto prjekte të Serbisë. Çdo kush e di që projekti final i Serbisë është zhbërja e tërë Kosovës.
Si ishte reagimi i masës, i bashkëqytetarëve tuaj?
Qytetarët e kanë pritur prezencën time në manifestim, nuk ka qenë ndonjë befasi dhe atyre ju ka ardhur tepër mirë që kam qenë në mesin e tyre për pak çaste.
A mbajte fjalim, çfarë thatë para qytetarëve?
Unë kam mbajtur fjalim, kam qëndruar në manifestim një orë dhe më pas jam kthyer në shtëpi.
Unë në fjalimin tim kam thënë se qytetarët po e kryejnë detyrën e tyre, dhe unë edhe të deputetit që më ngarkon, sikur secilin prej qyetarëve që ta mbrojmë Republikën me çdo kusht, këtë vend që me gjak e sakrifica e kemi sjell deri këtu.
Republikën do ta mbrojmë, ndërsa mbesim të vendosur që Kosovën ta bëjmë shtet Sovran. Hiqni dorë nga evokimi i të drejtave të Serbisë në Kosovës, sepse ata në fund do t’ju hedhin në plehra të historinë, bëhuni me popullin, sepse populli ua ka kthyer shpinën, ndërsa dijeni që ‘Zajednica’ nuk kalon.
Si është për një deputet të arrestohet nga shteti i tij?
Për fatin e individit nuk është e rëndësishme, por për fatin e shtetit kjo është një çështje për të brengosur sepse demokracia është kah fundidhe shihet hapur që qeveritarët po synojnë ta eskalojnë një shtet dhe një udhëheqje që është larg demokracisë dhe me fjalë tjera quhet diktaturë.
A do ta përsëritni sërish veprën, pra të gjuani prapë gaz lotsjellës në Kuvend?
Vepra ime është mesazh politik dhe përpjekje për t’i mbrojtur interesat e vendit. Kjo është në përputhje me betimin e deputetit dhe bindjen time të plotë si qytetarë i Republikës së Kosovës, që kur unë kam filluar ta kuptoj ç’është atdheu dhe kjo është para pesë dekadave dhe këtë bindje nuk do të ma ndryshoi askush edhe nëse përdorin represionin.
Për fund si e shihni tejkalimin e krizës politike dhe cili është mesazhi juaj për qeveritarët?
Nuk është hera e parë që publikisht ju kam dërguar mesazh qeveritarëve, kryeministrit dhe zëvendësit të tij që të ulen dhe ta kuptojnë por ta respektojnë vullnetin e popullit, interesat e qytetarëve.
Opozita i ka 205 mijë nënshkrime të qytetarëve të moshës madhore që e kanë kundërshtuar këto marrëveshje, prandaj e dijnë që të tërhiqen nga marrëveshjet, të ulen i gjithë spektri politik dhe për vendime madhore bashkarisht të vendosin.
Nëse qeveritarët vendosin pa asnjë lloj transparence dhe nën ndikimin e Serbisë dhe përkrahjen e disa ndërkombëtarve, natyrisht problemet do të vazhdojnë derisa qeveritarët një ditë do të shmangen nga pozitat dhe përgjegjësitë që i kanë. /tesheshi.com/
