Deputeti i Nismës Socialdemokrate të Kosovës, Milaim Zeka, akuzoi policinë shqiptare se ka ndërmarrë fushatë ndaj kosovarëve.
Në një fjalim që mbajti në parlamentin e Kosovës, Zeka akuzoi qeverinë shqiptare për keqtrajtim ndaj pushuesve nga Kosovë, ku i ka marrë patentat për shkelje që ai i cilësoi “fantazmagorike”.
Akuza u dha gjatë një debati parlamentar mbi ligjin e unifikimit doganor mes Shqipërisë dhe Kosovës.
Milaim Zeka tha se është e kotë të merremi me tema të mëdha, pasi policia e Shqipërisë po u sekuestron patentat shumë drejtuesve të mjeteve nga Kosova.
“Edhe mua ma kanë marrë patentën të premten dhe më kanë thënë që paraqitu në gjykatën e Lezhës të hënën”, tha ai.
Zeka shkoi më tej, duke akuzuar qeverinë shqiptare se po e ndalon unifikimin e doganave.
“Është qeveria e Tiranës dhe Brukseli që ndalon tregtinë e lirë mes dy vendeve”, tha Zeka, i cili deklaroi se Ministri i Diasporës Pandeli Majko ka shkelur premtimin e tij se do të happen kufijtë mes dy vendeve.
“Këtë gjë e pengon biznesi ynë, por edhe Tirana e Brukseli, kurse Prishtina po e don, por kjo është thjeshtë një fontanë dëshirash dhe jo një gjë që mund të realizohet”, tha Zeka
/tesheshi.com/
