Thotë se pajtohet me qëndrimet e kryetarit të tij Ramush Haradinaj. Uljen në tavolinë të kreut të partisë me Thaçin e Mustafën e sheh një gjë të mirë pasi thotë se uaka bërë të qartë partive në pushtet qëndrimet e opozitës së bashkuar.
Kështu, deklaronnë një itnervistë dhënë për portalin tesheshi.com deputeti i AAK-së, Bali Muharremaj.
Ai në këtë intervistë është shprehur disi i rezervuar në disa nga pyetjet që i janë shtruar.
Nuk jep një përgjigje nëse VV, AAK e NISMA do të vazhdojnë rrugën e përbashkët në zgjedhje dhe pas tyre, ku lista e përbashkët zgjedhore shihet si një pikë ku mund t’ua ndan rrugën këtyre partive. Për këtë çështje thotë se Haradinaj do të njoftoj opinionin publik me kohë.
Në këtë intervistë, deputeti Muharremaj flet edhe për protestën e 17 shkurtit, derisa tregon nëse mund të jetë apo jo sërish kandidat i AAK-së për kryetar të Therandës në zgjedhjet lokale që do mbahen vitin e ardhshëm.
Intervistoi: Blendi Gashi
Kreu i partisë suaj, Ramush Haradinaj, vendosi së fundmi të ulet në tavolinë me Thaçin e Mustafa. A është diskutuar në strukturat partiake kjo çështje apo ka vendosur vetvete lideri juaj të merr pjesë në takimin në fjalë?
Patjetër që diskutohet. Është diskutuar edhe për këtë. Takimi në këtë rast, sipas mendimit tim është gjithmonë një formë më e mirë. Janë bërë të qarta qëndrimet dhe kaq.
Pas takimit, mediat duke cituar kreun tuaj raportuan se ai nuk do të merr pjesë më në takimet eventuale të radhës, derisa ju pohuat në një emision se do të shkoj sërish në takime të tilla. Pra, ju si deputet i AAK-së, a mund të tregoni do të shkoj apo jo sërish Haradinaj nëse i ribëhet ftesë nga Jahjaga?
Diskutimi në emision ka qenë në të ardhmen. Në të ardhmen sigurisht do të veprohet sipas diskutimeve brenda subjektit tonë politik dhe rrjedhave të situatës. Kryetari Haradinaj ka vlerësuar situatën dhe sigurisht që pajtohem me qëndrimet e tij. Në politikë gjithmonë ka çka të diskutohet, pse jo edhe përmes një takimi formal, njohës me qëndrimet e palëve, por kur shkelet gjithçka mbi ligjet dhe kushtetutën e vendit atëherë është protesta.
Tani,kryetari ynë ka vendos, siç po thuani ju, ne sigurisht që pajtohemi, lideri përfaqëson shumicën në parti, ne diskutojmë pastaj vendosim. Lidhur me këtë s’ka pasur kundërshtime, në asnjë variant.
Prandaj shihemi më 17 shkurt në Demonstratë.
Opozita e bashkuar përkundër disa mospajtimeve që ndodhën ditën e fundit konfirmoi se nuk do të çahet. Pse mendon se është krijuar në publik një lloj perceptimi se Haradinaj në një moment mund të bashkohet në qeverisje me PDK-në dhe LDK-në, dhe sa ka gjasa të del real ky perceptim.
A janë gjasat më të mëdha që të jeni së bashku edhe pas zgjedhjeve apo të vazhdoni betejën si parti të vetme?
Për të gjitha këto sigurisht se z. Haradinaj do t’iu njoftoj me këto qëndrime që i përmendët. Tani për tani me sa jam i njoftuar po përgatitemi me protestën e radhës.
Zgjedhja e presidentit është një çështje që do ta tregoj sadopak se çfarë kahje të mëtejme do të merr kriza politike. Ju si opozitë e bashkuar a keni vendosur ende se si do të veproni dhe nëse perosnalisht nga ju kërkohet që të hedhni gazlotsjellës a do ta bëni një gjë të tillë?
Të gjitha veprimet tona, deklaratat, qëndrimet tona janë publike. Për gjithçka sigurisht se do të njoftoheni me kohë.
Më 17 shkurt do të mbani protestën e radhës në Prishtinë. Pritni të shkojë paincidente apo mund të shihen pamje të njëjta si në protestën e fundit?
Protesta do të jetë paqësore. Bashkë me gruan dhe fëmijët marrë pjesë në protestë. Tani mund ta logjikoni në bazë të pjesmarrjes time në këtë rast.
Ju si deputet nga komuna e Suharekës a keni takuar ditët e fundit bashkëqytetarët për t’i ftuar që të jenë pjesë e protestës. Nëse po, sa janë të gatshëm të dalin të protestojnë, çfarë thonë ata për situatën aktuale dhe cilat janë brengat e tyre ?
Gjithmonë takohemi me qytetarët dhe diskutojmë mbi situatën politike. Gadishmëria e tyre u pa më 9 janar. Tani më 17 shkurt mendoj se do të jetë masovike.
Mazhoranca dhe diplomatë të caktuar të huaj thonë se zgjedhjet nuk janë zgjidhje dhe se nuk do ta ndryshonin përbërjen e Kuvendit. Edhe sondazhe të ndryshme tregojnë se partitë në pushtet mund të dalin si triumfuese, derisa AAK-në e renditin të katërtën. Çfarë nëse mbeteni edhe pas zgjedhjeve nuk vini në pushtet, qoftë si opozitë e bashkuar ose veç si AAK, varësisht si garoni?
Zgjedhjet janë mekanizmi i demokracisë. Të shkojmë në zgjedhje pastaj e shohim rezultatin dhe veprojmë.
Nga politika nacionale të kthehemi tej ajo lokale. Keni qenë kandidat i AAK-së për kryetar të Therandës por që humbët në zgjedhjet e kaluara. A pritet që të garoni sërish për të parin e qytetit? Dhe, si e vlerësoni udhëheqjen e bërë nga kryetari aktual Sali Asllanaj, sa janë të kënaqur sipas jush qytetarët me udhëheqjen e tij?
Mendoj të kandidoj, por kjo sigurisht se ka kohë dhe do të diskutohet në parti.
Për Qeverisjen e Sali Asllanajt ka shumë çka të flitet për skandale, ngecje, keqqeverisje dhe dështime totale. Sukseset janë të pakta në këtë aspekt. Për të gjitha i kam thënë publikisht dhe gjithashtu për të gjitha këto është informuar edhe nga mediet.
Në muajin nëntor të vitit të kaluar ju keni ngritur zërin duke thënë se spitali i Prizrenit përgjohet nga policia pasi janë vendosur kamera dhe përgjues në dhomat e mjekëve. A keni informata, çfarë është bërë me këtë rast, a është vënë dikush para përgjegjësisë?
Ende, lidhur me këtë nuk jam njoftuar. Jam i informuar rreth rrjedhave vetëm në bazë të medieve.
/tesheshi.com/
