Deputeti i Bashkimit Demokratik për Integrim, Artan Grubi do të nisë një iniciativë në Kuvend për përgjegjësinë e drejtuesve të Agjencionit për Zbulim për rastin e Kumanovës. Siç thotë Grubi, dëshmitë e protagonistëve(të akuzuarve) e konfirmojnë në tërësi që BDI dhe kryetari Ali Ahmeti absolutisht nuk kanë gisht në këtë ngjarje tragjike.
“Gjykimi i deritanishëm në rastin e Kumanovës nëpërmjet prezentimit të dëshmive nga ana e protagonistëve të ngjarjes po zbulon të vërtetën shokuese për përfshirje mashtruese në këtë rast të agjentëve të Agjencionit për Zbulim, që është nën kompetencat e Presidentit Ivanov. Në cilësinë e Deputetit, do të nis një iniciativë në Kuvend për përgjegjësinë e drejtuesve të agjencionit për zbulim në këtë rast kaq të rëndë. Njëkohësisht, dëshmitë e protagonistëve e konfirmojnë në tërësi që BDI dhe Kryetari Ahmeti nuk kanë asnjë gisht të vetëm në këtë ngjarje tragjike. Prandaj miq, e vërteta po del në shesh përkundër gjithë fushatës së tmerrshme dhe të papërgjegjshme mediatike dhe opozitare” ka shkruar në facebook deputeti Grubi.
Njëri nga të akuzuarit e rastit të Kumanovës, në seancën e fundit para gjykatës kishte deklaruar se njerëz nga Agjencioni për Zbulim në Maqedoni kanë qenë të involvuar në montimin e rastit në fjalë.
Mirëpo në opinion e më gjërë ekzistojnë dyshime të mëdha se lideri i BDI-së, Ali Ahmeti është skenaristi kryesor i rastit të Kumanovës. Të gjitha këto dyshime bazohen në faktin se Ahmeti assesi nuk e ka pranuar që njeh ndonjërin nga ushtarët e ish-UÇK-së të cilët paraprakisht kishin kërkuar ndihmë në linjë telefonike që të shpëtojnë të gjallë nga sulmet e forcave maqedonase.
Nga ana tjetër, në grupin e ish-ushtarëve të UÇK-së, të cilët morrën pjesë në konfliktin e armatosur ndodheshin ushtarët më të njohur të luftërave në Kosovë dhe Maqedoni si Mirsad Ndrecaj, Beg Rizaj dhe Sami Ukshini.
Madje sipas Ukshinit, Ali Ahmeti disa herë është takuar me shumicën e ushtarëve të UÇK-së të cilët morrën pjesë në konfliktin e Kumanovës.
Të gjitha këto prova të palëve, ngelen diskutabile derisa të dëshmohet e vërteta nga ana e gjykatës.
Kujtojmë se vitin e kaluar në “Lagjen e Trimave” në Kumanovë, një grup i armatosur është përleshur me forcat e sigurisë të Maqedonisë. Nga rasti në fjalë, u vranë 8 policë nga njësitet speciale dhe nga njësitet e veçanta të MPB-së, ndërkaq 4 të tjerë u plagosën. Nga ana tjetër humbën jetën edhe 10 pjesëtarë të grupit të armatosur, pjesa dërmuese me prejardhje nga Kosova. M.Krasniqi – /tesheshi.com/
