Mëngjesin e së shtunës të javës që lamë pas, deputeti i PDIU-së, Aqif Rakipi, aksidentoi për vdekje në aksin Vorë-Tiranë, një qytetar, i cili po kalonte rrugën.
Pas aksidentit, Rakipi i vetëdorëzua në polici, ndërsa disa orë më pas Prokuroria nxorri konkluzionet se deputeti do të hetohej në gjendje të lirë dhe se viktima kishte faj.
Familjarët e Seit Sorrës, viktimës së aksidentit, ditën e parë të ngjarjes shprehën habinë sesi mund të lirohej nga burgu deputeti, ndërsa hodhën dyshime për largimin e tij nga vendi i ngjarjes.
Por sot ata e cilësojnë thjesht si një aksident, që mund t´i ndodhë kujdo, shkruan Panorama.
Djali i viktimës thotë se nuk ka qenë në vendngjarje dhe nuk është ai personi përgjegjës për të treguar se çfarë ka ndodhur.
Ai thotë se do të jetë drejtësia ajo që do të shpjegojë se si ka ndodhur aksidenti, ndërsa për deputetin Aqif Rakipi thotë se nuk ka asgjë kundër.
Të njëjtën gjë konfirmon edhe vëllai i viktimës, i cili ditën e shtunë shprehej se, njerëzit e Rakipit u kishin dërguar fjalë për të shkuar për ngushëllim, por ende nuk kishte pranuar asgjë. /tesheshi.com/
