Në emisionin e dytë me radhë në “Rruga e re” të Muhamed Zekirit, si mysafir të ftuar ishin deputeti më i revoltuar i BDI-së, Rafis Aliti dhe ish deputeti Abedin Zymberi. Në dallim nga bashkëpartiakët e tij që solidarizohen me punët e BDI-së, Aliti u tregua më realist dhe pranoi faktin që BDI nuk e ka realizuar atë që e ka premtuar.
“Realisht ne nuk kemi arritur të realizojmë të gjithë atë që i kemi premtuar elektoratit shqiptar në Maqedoni, për shkak të ngjarjeve që kanë ndodhur në Maqedoni, në rajon dhe me gjerë, çka ka reflektuar edhe tek neve brenda BDI-së, pra brenda koalicionit. Ne duhet të jemi korrekt, se ne nuk kemi arritur të realizojmë në tërësi atë që kemi premtuar. Nuk kemi arritur pasi nuk jemi në fund të mandatit”, tha Aliti.
I të njëjtit mendim me Alitin ishte edhe ish deputeti Abedin Zymberi i cili u shpreh se BDI, nuk ka arritur të realizojë atë që ka premtuar para elektoratit, duke vrapuar pas interesave të tyre personale.
“Fatkeqësisht BDI duke përjashtuar disa individë, ka një shumicë të strukturës që kanë marrë funksione të mëdha, të cilët deri më sot asnjëherë nuk kanë qenë të gatshëm të japin raport për veprimet e veta. Kjo ka rezultuar me fuqizimin e VMRO-së”, tha Abedin Zymberi.
Gjatë emisionit u hap edhe debati mbi idenë e zgjedhjes së presidentit të shtetit, ku Aliti përsëriti qëndrimin e BDI-së, se njëri prej posteve kyçe duhet t’i takoj shqiptarëve.
“Nuk është e vërtet se ne kemi tradhtuar elektoratin. Qëndrimi jonë ka qenë mos ta votojmë asnjërin prej kandidatëve. BDI ngelet në qëndrimet se njëra nga tre postet kyçe në këtë vend i takon shqiptarëve. Dhe jo rastësisht, ne edhe sot nuk e pranojmë presidentin Ivanov si legjitim”, tha Aliti.
Kësaj deklarate të Alitit, i replikoi Abedin Zymberi, i cili u shpreh se BDI ka aktruar kinse nuk e pranon Ivanonvin, ndërsa është futur në qeveri “duke u pajtuar me të gjitha ato që i ka propozuar VMRO”.
Lidhur me anketën e realizuar nga IRI, nga e cila doli në sipërfaqe se BDI-ja ka pësuar rënie drastike të renditjes, Haliti u përgjigj duke akuzuar postet e përjetshme të disa funksionarëve të lartë në BDI. Sipas tij BDI ka nevojë për reforma brenda partisë.
Ndërkaq sipas Zymberit, si pasojë e pakënaqësive të disa funksionarëve tjerë të lartë të BDI-së, doli partia e re “Uniteti”, që me shumë gjasa do bashkohen me partitë tjera për ta përforcuar opozitën./tesheshi.com/
