Agron Çela është deputeti i LSI në qarkun e Shkodrës, i cili sot ka munguar në mbledhjen e grupit parlamentar të partisë së tij.
Por në të njëjtën kohë, kur Monika Kryemadhi mbante një fjalim para deputetëve të kësaj partie, duke u shprehur se do të bënin një opozitë të fortë, Çela takohej me kryeministrin Edi Rama në Velipojë.
Sikundër raportohet takimi është bërë në resortin “Grand Europa”, pasi Rama përfundoi me ministrat takimin dyditor, në atë që quhet si mbledhja jozyrtare e qeverisë së re.
Nuk dihet se çfarë mund të jetë diskutuar në këtë takim, por nuk përjashtohet mundësia, që Çela të ndryshojë grupin parlamentar, duke iu bashkuar PS-së.
Socialistët kanë 74 vota në Kuvend dhe çdo votë shtesë mund t´i japë më shumë qetësi kryeministrit, megjithëse grupi i tij parlamentar është i konsoliduar dhe shanset që të tradhëtohet nga brenda janë minimale.
Gjithsesi në ditët në vijim do të shihet nëse ligjvënësi i LSI-së, do t´i qëndrojë besnik apo jo forcës politike ku aderon tani. /tesheshi.com/
