Kryeministri i Malit të Zi, Milo Gjukanoviç, ka arritur të marrë votëbesimin nga Parlamenti i këtij vendit vetëm falë dy deputetëve shqiptarë që votuan “pro”.
Legjislativi i vendit të vogël fqinj ka gjithsej 81 deputetë dhe, për të miratuar një ligj apo për të dhënë votëbesimin duhen 42 vota në favor.
Opozita proserbe ndoqi një taktikë ndryshe, duke mos qenë e tëra në Kuvend, siç quhet pra Legjislativi, dhe ka qëndruar vetëm një pjesë. Në seancën e mbrëmshme kanë qenë prezentë 62 parlamentarë, nga ku 42 votuan “pro” dhe 20 “kundër”.
Dy deputetet shqiptarë, Genci Nimanbegu dhe Nik Gjeloshaj ishin vendimtarë për vazhdimin e qeverisjes.
Por kjo votë “pro”, edhe pse gjeopolitikisht korrekte për shkak të kërcënimit serbo-rus ndaj republikës së vogël, ka shkaktuar një reagim jo pozitiv ndër shqiptarë, të cilët kanë kritikuar ashpër votën “pro” të pashoqëruar me asnjë koncension politik paraprak; sepse është bindja se, edhe pse shqiptarët janë treguar mjaft luajal me pushtetin e Podgoricës, ka ndodhur që gjithnjë ta kenë pësuar.
Në fjalimin përmbyllës të tij për arsyetimin e votës, deputeti Nik Gjeloshaj bëri disa kërkesa për qeverisjen si: zgjedhjet e reja lokale në Tuz deri në fund të vitit, përkrahje nga shumica e re për ndryshimin e ligjit për zgjedhjen e deputetëve dhe këshilltarëve, që shqiptarëve t’ju kthehen të drejtat nga ligji i kaluar; si dhe në qeverinë e re, shqiptarët të kenë një ministri, gjë e cila të sanksionohet dhe me ligj për të gjitha qeveritë e ardhshme.
Ndërsa kryeministri Gjukanoviç, në fjalën e tij përmbyllëse nuk përmendi fare nëse këto kushte do të plotësohen apo jo.
Pikërisht, këtë qëndrim të Gjukanoviçit shqiptarët nëpër rrjete sociale e kanë cilësuar arrogant dhe kanë sulmuar votën apriori të dy deputetëve.
“Asgjë e re, se mos është hera e parë, prap na e futën. Shqiptarët i bënë shtetin e jo më votbesimin e kësaj qeverie!”, shprehet një qytetare e irrituar në rrjetet sociale. Dhe në fakt shqiptarët ishin vendimtarë edhe në votën e referendumit të pavarësisë. Por Gjukanoviçi u hoqi drejtimin e ministrisë.
Ndërkaq, shumë qytete shqiptare po braktisen dhe Kraja, Plava e Gucia janë tashmë të shpopulluara; ndërsa rrugët e sa prej tyre janë emërtuar me emrat e vrasësve të shqiptarëve. /tesheshi.com/
