Kreu i mazhorancës Edi Rama shpalosi programin e 25 prillit, duke ofruar një risi befasuese gare brenda PS, por në raport me kundërshtarin. Emrat e parë në listë, përfshirë dhe të tijin, nuk do jenë në krye, pra në zonën e sigurt të mandatimit, por aty ku ka një kufi mes marrjes osë jo marrjes së mandatit.
Qarqet, me përjashtim vetëm në Erion Braçes në Fier, do kryesohen krejtësisht nga emra të rinj, madje aspak partiakë, pra që janë prurje të reja, ku veçon Tirana me dyshën befasuese Çomo-Bozo.
“Çfarë kuptim ka që të jem në vend të parë në Durrës dhe Vlorë. Unë do vendosem mes atyre për të realizuar objektivin bazë. Nuk mund tu them drejtuesve të qarqeve ‘ju shkoni luftoni në kufirin poshtë dhe unë po ju shoh nga lartë”, tha Rama.
Prurjet e reja, ai i konsideroi si një vijim i traditës së Nanos në lidhje me reformimin e PS-së.
“PS ka rilindur nga vullneti i posaçëm i vetëndryshimit që është në ADN e kësaj familje të madhe politike. Këtë e kishte si pikë referimi Fatos Nano më parë dhe unë jam përpjekur ta forcojë edhe më shumë, pasi fuqia e vetëndryshimit e bën partitë të paplakshme dhe të pa konkurueshme në arenën politike të Shqipërisë.
Ne mbetemi alternativa më e pëlqyer e shqiptarëve, por as nuk jemi pa gabime dhe as më të mirët. Por më të mirë se ne nuk ka pasi askush më mirë se ne nuk di të vetëndryshojë”, arsyetoi kreu i mazhorancës.
Ai tha se skuadra e 25 prillit nuk është vetëm për të fituar zgjedhjet por dhe për të qeverisur.
“Ne nuk na lejohet që të bëjmë skuadra e programeve sa për të marrë vota, se ne kemi detyrimin që të jemi shumë të qartë e konkretë që të garantojmë rezultatet e duhura të bashkëqeverisjes, me një skuadër të fortë në zgjedhje e qeverisje”, theksoi Rama.
Ai shtoi se synimi janë 78 mandate, ndërsa maksimalja janë 88 mandate.
Ja kryesuesit e listave në qarqe, shpallur nga Rama:
Edona Bilali në Shkodër,
Pranvera Resulaj në Vlorë,
Greta Duraku në Kukës,
Eni Zake në Korçë,
Lavdrim Krashi në Dibër,
Hatixhe Konomi Berat,
Najada Çomo dhe Luljeta Bozo në Tiranë,
Erion Braçe në Fier,
Evis Kushi në Elbasan,
Mirela Kumbaro në Gjirokastër,
Lindita Nikolla në Kurbin,
Milva Ekonomi në Durrës. /tesheshi.com/
