Ashtu siç paralajmëruan analistët politikë në një prononcim për portalin tesheshi.com, se e vetmja mënyrë për ta shkarkuar me procedurë të shpejtë kryeprokurorin e Maqedonisë, Marko Zvërlevskin, ishte që kryetari i Kuvendit duhet t’i ndalojë të drejtën e fjalimeve procedurale opozitës, ashtu edhe ndodhi.
Sot, kryetari i Kuvendit, Talat Xhaferi ua mohoi fjalimet procedurale deputetëve të VMRO-DPMNE-së, Antonio Milloshovskit dhe Vllatko Gjorçevit, në mënyrë që të kalohet në votimin e shkarkimit të Zvërlevskit.
Të revoltuar nga ky vendim, deputetët e VMRO-së bllokuan foltoren e Kuvendit, duke mos lejuar zhvillimin e procesit normal të seancës parlamentare.
Për këtë shkak, Xhaferi u detyrua të bëjë një pushim dhe më pas të vazhdohet me seancën parlamentare.
Opozita, veçanërisht VMRO-DPMNE, është kundër shkarkimit të kryeprokurorit, Marko Zvërlevski për arsye se i njëjti është i lidhur ngusht me të gjitha rastet e dyshuara kundër funksionarëve të lartë të kësaj partie. /tesheshi.com/
