Taulant Balla është votuar me 69 vota pro dhe 1 kundër në postin e kryetarit të grupit parlamentar socialist. Në këtë pozicion, Balla zëvendëson Gramoz Ruçin, i cili pritet që nesër të zgjidhet në postin e Kryetarit të Kuvendit.
Në mbledhjen e parë të grupit parlamentar, kryeministri Edi Rama ka dhënë disa porosi për deputetët, duke i kujtuar takimet që duhet të kenë në mënyrë të përjavshme me zgjedhësit.
Rama gjithashtu tha se nuk do të pranohet asnjë ndërhyrje e ligjvënsve për të emëruar pozicionet teknike në administratë, ndërsa kërkoi prej tyre të jenë të pranishëm në çdo seancë parlamentare, duke filluar nga ajo e së shtunës.
Ndërkohë, ai ka bërë të njohur se të hënën pritet që parlamenti të rimblidhet për të votuar qeverinë, nga ku kryeministri do të prezantojë programin 4 vjeçar të PS. Në po të njëjtën ditë do të bëhen publike dhe emrat e drejtuesve të komisioneve parlamentare dhe ekipi drejtues i grupit parlamentar.
“Fillim javën e ardhshme do të paraqesim në kuvend qeverinë e re, programin e saj dhe më pas do të paraqesim dhe kryetarët e komisioneve parlamentare. Kemi hartuar tekstin e marrëveshjes së mirëkuptimit, mes qeverisë, grupit parlamentar dhe partisë, e cila do të nënshkruhet në prani të të gjithë anëtarëve të PS”, tha Rama. /tesheshi.com/
