Me një shumicë dërrmuese, parlamentarët grekë kanë votuar sot për përshpejtimin e ndërtimit të një xhamie në Athinë.
Siç lajmëron agjencia e lajmeve AMNA, për dispozitën ligjore për përshpejtimin e ndërtimit të xhamisë votuan 206 deputetë nga 230 të pranishëm në sallë.
Vetëm 24 deputetë votuan kundër, ashtu siç kundër u shprehën veç dy parti, Agimi i Artë dhe Grekët e Pavarur (ANEL).
“Ekzistenca e xhamive të bëra kuturu është një turp për vendin dhe për bashkësinë muslimane, si dhe një rrezik për sigurinë kombëtare,” mësohet të ketë thënë ministri i Arsimit, Nikos Filis.
Në Athinë besohet të jetojnë më tepër se 200.000 muslimanë, të cilët i kryejnë ritet e tyre në xhami apo në mjedise jo të njohura zyrtarisht.
Xhamia e re do të ndërtohet në perëndim të Athinës, në Votanikos. Qeveria greke e ka premtuar që në vitin 2006 ndërtimin e një xhamie me paratë publike. Një sërë shtyrjesh, edhe të karakterit ligjor, e kanë penguar ecjen përpara të projektit. Kjo do të jetë xhamia e parë zyrtare që do të ndërtohet në Athinë në mbi 180 vite. /tesheshi.com/
