Ekipet e kandidatëve për deputetë të dy partive të mëdha kanë sjellë shumë emra të rinj në politikë, duke paralajmëruar kështu dhe një rifresim në masë të madhe sallën e parlamentit të ri që do të lindë pas 25 qershorit.
Por disa deputetë i kanë mbijetuar edhe kësaj liste duke vendosur rekorde të jetëgjatësisë në politikën aktive dhe përfaqësimit në Kuvend.
Nga zgjedhjet e para pluraliste në vitin 1991 e më pas në vitin 1992 e deri më sot kur mbahen zgjedhjet parlamentare të vitit 2017, vetëm 6 emra i kanë mbijetuar dallgëve të politikës dhe pritet të jenë edhe 4 vite të tjera në sallën e Kuvendit.
Ata janë 6 deputetë, 3 të Partisë Socialiste dhe 3 të Partisë Demokratike: Gramoz Ruçi, Pandeli Majko dhe Musa Ulqini nga e majta dhe Sali Berisha,Tritan Shehu dhe Dashamir Shehi.
Berisha, Ruçi e Shehu u futën në parlament nga zgjedhjet e para të vitit 199, ndërsa Majko, Ulqini dhe Shehi në zgjedhjet e 22 marsit të vitit 1992.
Disa prej tyre kanë bërë shkëputje të shkurtra në një mandat për t’u kthyer përsëri në Kuvend.
Ata kanë qenë gjithë kohën në lojën e politikës, në poste drejtuese në parti apo qeverisje, si protagonistë në lojën e brendshme të partive apo me ikje-ardhjet në parti.
Ruçi ka bërë një ndërprerje në vitin 1996, Shehu u shkëput më 2001 dhe 2013, Ulqini pati një ndërprerje në 2009-ën kur Edi Rama e hoqi nga lista për t’u kthyer përsëri në 2013-ën dhe Dashamir Shehi gjithashtu ka disa vite ndërprerje pas ndarjes nga PD-ja.
Por të gjithë kanë mbetur në lojë dhe sot janë drejtues në parti ose aktiv në politikë. Ndër thyes rekordi mbetet Berisha, gjithnjë i pranishëm në Kuvend, gjithnjë aktiv dhe zëbuçitës. /tesheshi.com/
