Nga Blendi Gashi
Disa ngjarje të ndodhura ditëve të fundit në Kosovë, si arrestimi i katër personave të armatosur në afërsi të Manastirit të Deçanit, apo vënia e eksplozivit në oborrin e një xhamie në Drenasi, ka alarmuar anëtarët e Komisionit Parlamentar për Mbikëqyrjen e Agjencisë Kosovare për Inteligjencë (AKI).
Ky komision thotë se AKI duhet të japë shpjegime për gjendjen e sigurisë në në vend.
Deputetja e LDK-së Melihate Termkolli, anëtare e komisionit , thotë se është e papranueshme që deputetët të informohen nga mediat, e shpesh herë dhe të dezinformohen, siç tha ajo për gjendjen e sigurisë në vend.
Kurse Nenad Rashiq nga Lista Serbe, ka deklaruar se duhet të bisedohet me drejtorët e AKI-së për funksionimin e këtij agjensioni, në mënyrë që të pengohen ngjarjet që ndodhën ditëve të fundit në vend.
Edhe eksperët e sigurisë thonë se AKI-ja duhet të raportojë në vijimësi për gjendjen e sigurisë në vend, në të kundërtën është përgjegjëse për eskalimin eventual të situatës.
Eksperti i sigurisë, Burim Ramadani thotë se raportimi i rregullt dhe ai në bazë të kërkesave të mekanizmave mbikëqyrës, duhet të ndodh në vazhdimësi.
Ramadani në një prononcim për tesheshi.com thotë se edhe mbikëqyrja parlamentare duhet të funksionojë, por edhe njoftimet apo vlerësimet publike ndihmojnë në qartësimin e situatave të ndryshme të sigurisë.
“Zakonisht, nuk është iniciativë e AKI-së që të shpërndajë vlerësime publike, por kjo bëhet në bazë të kërkesave. Sidoqoftë, i mbetet udhëheqjes së agjencisë që të vlerësojë nëse është e domosdoshme ndonjë komunikim publik në këto rrethana”, ka thënë eksperti Ramadani.
Njohësi i rrethanave të sigurisë në vend, Hajrullah Tërnava, ka thënë për tesheshi.com se shërbimet adekuate shtetërore, si policia, prokuroria, gjykatat e në rend të parë AKI, duhet të merren me rastet që kanë ndodhur së fundmi.
“Gjithësesi, AKI-ja përveq mënyrës të rregullt që duhet të informoj organet shtetërore si kryetaren e shtetit, kryeministrin, kryeparlamentarin dhe komisionin për siguri në Parlament e Ministrinë e Brendshme. AKI-ja duhet të jetë e gatshme që në çdo situatë të informoj dhe të merr masa preventive dhe aktive që mos të vjen puna deri te më e keqja e madhe, te eskalimi ose përkeqësimi i situatës së sigurisë në vendin tonë, në të kundërtën duhet të japin edhe llogari nëse nuk ndërmarrin masat adekuate në rastet e sipërpërmendura”, thotë Tërnava. /tesheshi.com/
