Drejtori i Agjencisë Kosovare të Inteligjencës (AKI), Driton Gashi, nuk ka shkuar për të informuar në komisionin parlamentar për mbikëqyrjen e AKI-së, edhe pse ky komision u ka dërguar tri ftesa për të raportuar në lidhje me arrestimin dhe deportimin e gjashtë gylenistëve.
Deputetja Ganimete Musliu tregoi arsyen pse sot kryespiuni nuk i është përgjigjur ftestës.
Ajo lexoi një letër të AKI-së, sipas së cilës, kryeministri Ramush Haradinaj ka kërkuar nga inspektori i AKI-së ndërmarrjen e veprimeve përkatëse për rastin e gylenistëve.
“Për arsye te pritjes së rezultatit të raportit kërkojmë të shtyhet. Në momentin që kemi raportin mund të dakordohemi për datën e raportimit”, deklaroi Musliu.
Drejtori i AKI-së, Driton Gashi pritej të raportonte për herë të parë për arrestimin dhe dëbimin e gjashtë gylenistëve për në Turqi.
Gashi është akuzuar si personi kryesor për deportimin e shtetasve turq. Kryeministri Ramush Haradinaj i ka kërkuar Gashit largim nga kjo detyre, por që ai ende nuk ka pranuar të japë dorëheqje. /tesheshi.com/
