Zëdhënësi i Departamentit të Shtetit, John Kirby, ka deklaruar dje se, “Çdo sugjerim se ne kemi ndryshuar pikëpamjen tonë mbi të ardhmen e Esadit është i rremë. Esadi e ka humbur legjitimitetin për të qeverisur. Nuk e kemi ndryshuar pikëpamjen tonë mbi këtë.”
Sekretari amerikan i Shtetit, John Kerry, vizitoi Moskën këtë javë, me krizën siriane në krye të axhendës së tij. Ndërkaq, agjencia ruse e lajmeve Interfax citoi zëvendësministrin e Jashtëm rus, Sergei Ryabkov, të thotë se Uashingtoni e pranon tani argumentin e Moskës që e ardhmja e Esadit nuk duhet negociuar.
Shtetet e Bashkuara të Amerikës u tërhoqën vitin e shkuar nga kërkesa për largimin e menjëhershëm të Beshar Esadit nga qeverisja e Sirisë, por ngulmojnë ende që ai duhet të tërhiqet gjatë procesit të tranzicionit politik.
Dhe në bisedimet e paqes në Gjenevë, përfaqësuesit e regjimit sirian e kanë kundërshtuar prerë diskutimin e pozitës së Esadit, duke mos pranuar ta bëjnë atë pjesë të diskutimeve.
Këto bisedime do të nisin sërish muajin që vjen, por deri tani nuk ka patur asnjë shenjë shpresëdhënëse. /tesheshi.com/
