Departamenti i Shtetit përshëndeti vazhdimin e dialogut ndërmjet Kosovës dhe Serbisë me përfaqësuesin special të Bashkimit Evropian në Bruksel dhe bëri thirrje që diskutimet të vazhdojnë urgjentisht.
“Këto janë biseda që ne i mirëpresim. Dhe ato po zhvillohen si pjesë e dialogut të ndërmjetësuar nga BE-ja në Bruksel dhe përfshijnë një diskutim për rregulloren e re të monedhës së Bankës Qendrore të Kosovës. Ne besojmë se këto diskutime duhet të vazhdojnë si një çështje urgjente”, tha zëvendës zëdhënësi i Departamentit të Shtetit, Vedant Patel në një konferencë për shtyp mbrëmë.
Ai shtoi se dialogu është i vetmi kanal për zgjidhjen e çështjeve që kanë të bëjnë me normalizimin e marrëdhënieve ndërmjet Serbisë dhe Kosovës.
“Shtetet e Bashkuara të Amerikës kanë qenë të qarta në shprehjen e shqetësimit të tyre në lidhje me rregulloren e re që kufizon hyrjen dhe përdorimin e dinarit serb në Kosovë, ne kemi shprehur shqetësime në këtë drejtim, si dhe kemi përsëritur thirrjet tona për Kosovën dhe Serbinë për të de-përshkallëzuar tensionet”.
Në Bruksel dje pas takimeve të ndara është mbajtur takimi trepalësh i kryenegociatorëve Petar Petkoviç dhe Besnik Bislimi me përfaqësuesin special të BE-së Miroslav Lajçak.
Pas takimit, Petkoviq deklaroi se një nga propozimet e Beogradit për zgjidhjen e çështjes së dinarit si mjet pagese në Kosovë është vazhdimi i punës së dërgesave bankare me rrugë postare.
Lajçak ka bërë të ditur në rrjetin social X se negociatorët kanë rënë dakord që biseda të vazhdojë të hënën më 25 mars. /tesheshi.com/
