Arben Frroku, akuzuar dhe dënuar me burgim të përjetshëm për vrasjen e komisarit të policisë Dritan Lamaj, ngjarje e ndodhur në 2013, duket se nuk do të dorëzohet deri në fund.
Dy muaj pasi Gjykata e Lartë e konfirmoi dënimin maksimal ndaj tij, 49-vjeçari i është drejtuar një tjetër gjykate, me pretendimin se i janë shkelur të drejtat kushtetuese.
Një burim i tha Top Channel se, përmes avokatëve në Shqipëri, Frroku ka dorëzuar një padi në Gjykatën Kushtetuese, në të cilën kërkon rigjykim.
Duke lënë në fuqi dënimin me burgim të përjetshëm të Gjykatës së Apelit për Krimet e Rënda, Gjykata e Lartë nuk e pranoi rekursin e Arben Frrokut, e pikërisht ky verdikt është bërë shkak që mbrojtja të hedhë sytë nga Kushtetuesja.
Një burim pranë kësaj gjykate pohoi se, avokatët argumentojnë si shkelje faktin se të njëjtët gjyqtarë që lanë në fuqi dënimin e përjetshëm, në fakt kanë shqyrtuar më herët edhe masën e sigurimit personal.
Arben Frroku u largua nga Shqipëria ditën që Gjykata e Shkallës së Parë e krimeve të Rënda e liroi nga masa e arrestit me burg, ndërsa disa javë më pas ishte Apeli që shpalli vendimin. Frroku u arrestua në Holandë me pasaportë false. /tesheshi.com/
