Përfaqësuesja e Përhershme e Shteteve të Bashkuara të Amerikës në NATO, Ambasadorja Julianne Smith, thotë se Rusia po përdor një sërë taktikash dhe strategjish hibride për të destabilizuar Ballkanin Perëndimor, duke shtuar se Aleanca do të bëjë gjithçka për të siguruar stabilitet dhe siguri më të madhe në atë rajon.
“Ky është qëllimi i tyre përfundimtar dhe për këtë ata përdorin instrumente klasike”, tha Smith në një konferencë për shtyp në internet.
“Një nga mjetet e preferuara është përdorimi i dezinformatave të cilat ata e përdorin gjerësisht në të gjithë rajonin për të ndarë shoqëritë nga brenda. Ata duan të ndajnë pikëpamjen evropiane të atij rajoni, të ndajnë Shtetet e Bashkuara të Amerikës nga aleatët e saj evropianë dhe miqtë tanë në Ballkanin Perëndimor”.
Reformat e sigurisë
Smith thotë se NATO po punon me anëtarët e Aleancës në rajonin e Ballkanit Perëndimor për të ndihmuar me reformat e vazhdueshme të sigurisë. Ajo tha se NATO bashkëpunon edhe me Serbinë.
“Askush nuk mund të thotë se aleanca e NATO-s po humbet fokusin (në rajonin e Ballkanit Perëndimor), përkundrazi. Ne jemi shumë të fokusuar në rajon dhe kundër asaj që rusët po përpiqen të bëjnë atje”, tha Smith.
Ajo kujtoi se Aleanca ka ende trupa në rajonin e Ballkanit Perëndimor, duke përfshirë Bosnje-Hercegovinën dhe Kosovën.
Por Rusia mohon se dëshiron të destabilizojë rajonin e Ballkanit Perëndimor, duke akuzuar Perëndimin për imponimin e një axhende politike perëndimore, duke përfshirë një narrativë anti-ruse, mbi vendet në rajon përmes politikave agresive. /tesheshi.com/
