Partia Demorkatike akuzon policinë e shtetit dhe bashkinë se favorizojnë individë të caktuar, sa i takon ndërtimeve pa leje në kryeqytet. Kryetari i këshilltarëve të PD-së në bashkinë e Tiranës, Leonard Olli në një deklaratë për mediat thotë se kushuriri i deputetit socialist, Taulant Balla po ndërton një vilë 2-katëshe në mënyrë ilegale dhe nuk ndalohet si çdo shkelës, pavarësisht denoncimeve të banorëve.
“Kjo ndërtesë ka lidhje me Taulant Ballën, deputetin e Partisë Socialiste, kushëriri i të cilit Mariglen Disha, ka bërë këtë ndërtim pa leje. Komisariati nr.2 ka tentuar të ndërhyjë për të rikthyer rendin dhe ligjin, por janë zbrapsur me urdhër politik, sepse policia e kapur nga Tahiri dhe nga Rama, nuk mund të veprojë kundër shefave të pushtetit, por vetëm ndaj qytetarëve të vobektë dhe të pambrojtur. Kjo është e vërteta në shtetin e së zhdrejtës së Edi Ramës dhe Erjon Veliajt”, thotë Olli.
Ai shton se një situatë e tillë ndeshet në çdo cep të Tiranës e më gjerë.
“Askush nuk mund të dalë mbi bandën e pushtetit, sepse banda e pushtetit mund të ndëshkojë çdo të pamundur, qoftë edhe për rregullimin e çative për qytetarët që nuk marrin leje tek ta, ose nëse nuk paguajnë nën dorë. Kjo është e papranueshme. Ky është denoncim i qytetarëve”, u shpreh Leonard Olli./tesheshi.com
