Ministri i Brendshëm Taulant Balla, hera e parë e tij në një post ekzekutiv, aq më tepër delikat siç është rendi, ka përcjellë një tjetër mesazh nga ato që i shkojnë më përshtat startit të një qeverisjes dhe jo 10-vjetëshit të saj, siç kjo e Ramës.
Balla jep të kuptuar se tashmë me të Rendi po tenton të vihet në shina, se “Policia që duam” s’paska qenë deri më tani e tillë e se me të në krye po tenton të jetë siç te sllogan lëshuar në nisje të qeverisjes.
Kreu i Rendit ka thënë të vërteta të hidhura për blutë që ai drejton, të cilët kanë një dekadë që shihen si të tillë: të implikuar në afera kanabisi. Por sipas Ballës, kjo nuk do të ndodhë më.
“Ndërsa gjatë javëve të fundit Policia e Shtetit ka zhvilluar shumë operacione lokale dhe në nivel kombëtar kundër kultivimit të lëndëve narkotike, jam edhe më i bindur se kjo luftë duhet të vazhdojë edhe më fort, përderisa përsëri e përsëri, tek apo tuk, kanabisi rinxjerr kokën sapo policia e kthen kokën nga ana tjetër. E kam thënë që ditën e parë në detyrë se një rrënjë kanabisi nuk ka shans të rritet, pa një polic që paguhet për të mos e parë apo se një parcelë kanabisi nuk ka mundësi të vetme të korret, pa një shef që paguhet nga trafikantët për të mos e shkulur apo kontrolluar në një pikë kalimi kufitar.
Goditja e një rasti tjetër kultivimi të bimëve narkotike, në Velipojë, ku u asgjësuan mbi 10 920 bimë të dyshuara narkotike cannabis sativa, nxorri në pah edhe përgjegjësinë apo mbylljen e syve të strukturave përkatëse të Policisë vendore. Pezullimi i menjëhershëm i Shefit të Stacionit të Policisë së Shtetit Velipojë bashkë me tre oficerë të tjerë policie në këtë stacion, është vetëm hapi i parë ndërshkimor për mbylljen e syve apo ndoshta edhe përfshirjen e tyre në bordorotë e grupeve kriminale që prisnin të korrnin ato 10 mijë bimë narkotike. Prandaj vetë-pastrimi i Policisë së Shtetit nga kushdo që tradhëton këtë luftë do të vazhdojë çdo ditë, pa kthim pas!
Gjithashtu, nisur nga rastet e kapjes së lëndës narkotike në pikat e kalimit kufitar, Agjensia e Mbikqyrjes Policore dhe Drejtoria e Përgjithshme e Policisë së Shtetit në bashkëpunim me Prokurorinë duhet të hetojnë plotësisht gjithë rrugëtimin që nga momenti i kultivimit apo hyrjes në territorin e vendit tonë, për të nxjerrë përgjegjësinë e atyre drejtorëve, shefave apo kontrollorëve policie që nuk e kanë bërë detyrën”, shkruan ministri Balla.
Kështu, në një farë mënyre ai po denoncon Policinë e deritanishme të drejtuar nga kolegë të tij partiakë, e cila paska qenë ajo “nuk e duam”.
Tashmë mbetet të shpresohet se Balla e ka vërtet seriozisht atë që thotë, pjesën përbetuese të tij për një Policia të pakanabizuar. /tesheshi.com/
