Ka reaguar Policia e Shtetit në lidhje me rastin e denoncimit të një ish-efektivi të saj në arrati, Emiljano Nuhu, i cili akuzon dy deputetë socialistë, Rahman Rrajadhe Taulant Balla, e më tej vëllanë e të parit Rexhep Rraja, se e kanë kërcënuar që të mos hetojë denoncimin e një vajze për përdhunim, ku përdhunuesi, sipas asaj çka dëshmuar ish-oficeri Nuhu, ka qenë djali i deputetit Rraja. Sipas policisë ka një mospërputhje faktesh që hedhin dyshime rreth dëshmisë.
“Ndryshe nga sa thotë oficeri Emiljano Nuhu në intervistën mediatike, se në datën 21 korrik 2018 është kërcënuar në zyrën e tij, në këtë datë oficer i gatshëm në Komisariatin e Krujës dhe që ka kryer veprimet ka qenë një punonjës tjetër policie, me iniciale G.Ç”, thuhet në reagim e Policisë së Shtetit.
Më tej, thuhet se Nuhu vërtet është takuar me dy vëllezërit, Rahman e Rexhep Rraja, i pari deputet, por aspak në ambiente policie dhe se komunikimet mes tyre tregojnë për njohje dhe afërsi shoqërore.
“Takimi mes oficerit Emiljano Nuhu dhe shtetasit e pretenduar R.Rr. dhe R.Rr. në një lokal në Tiranë ka ndodhur. Por nga verifikimet e kryera pas kallëzimit të bërë nga Emiljano Nuhu në Komisariatin nr. 6 në Tiranë dhe më pas referuar në Prokurorinë e Tiranës, rezulton se ata njiheshim shumë më herët, që në kohën kur Nuhu ishte me detyrë në Policinë e Tiranës. Komunikimet e kryera midis tyre përmes aplikacionit Whatsapp kanë qenë miqësore dhe pa kërcënime. Këto komunikime gjenden të administruara në dosjen hetimore. Gjithashtu në kallëzimin e tij, ku pretendon se është kërcënuar, Emiljano Nuhu i referohet vetëm 2 shtetasve të lartpërmendur, të cilët sipas tij, i janë prezantuar si të afërm të autorit të dyshuar që ka kryer përndjekjen, por nuk përmend asnjë prej emrave që deklaron sot në intervistën në media. Emra, të cilët në asnjë rast nuk i ka përmendur në komunikimet me eprorët e tij”.
Megjithatë, policia thotë se po e heton thellësisht rastin e ish-efektivit të saj. /tesheshi.com/
