Siguria e produkteve që konsumojmë çdo ditë është kthyer në një betejë të vërtetë për konsumatorët dhe autoritetet që i kontrollojnë subjektet e tregtimit.
Për këtë, Autoriteti Kombëtar i Ushqimit njofton se do të “punësojë” një model të ri survejimi, “inspektorin dixhital. Lajmin e bëri të ditur drejtori i AKU-së, Dritan Sejko, i cili tha se së shpejti do të vëjë në funksion të qytetarëve një portal online për të denoncuar rastet e shkeljeve.
“Shumë shpejt do të bëjmë funksional portalin online “Inspektori Dixhital” i cili do të bëjë të mundur përcjelljen në kohë reale, me zë dhe figurë, çdo shqetësim dhe perceptim që kanë konsumatorët në lidhje me sigurinë ushqimore. AKU do të jetë prezente në kohë reale për çdo rast të shqetësimit të qytetarëve për verifikimin dhe marrjen e masave të duhura për çdo shqetësim të denoncuar në këtë portal”, u shpreh Sejko.
Megjithatë, në shumë raste konsumatorët e pakënaqur kanë denoncuar raste flagrante deri në dyert e AKU-së, por ka rezultuar që problemi ngec tek inspektorët e korruptuar./tesheshi.com/
