Futbollisti i njohur ukrainas dhe i Manchester City-t, Oleksandr Zinchenko, ka bërë sërish thirrje për t’i dhënë fund luftës në vendin e tij.
Në një deklaratë për Guardian, Zinchenko zbuloi gjërat e urryera që po bëjnë rusët gjatë agresionit kundër ukrainasve. Ai thotë se vrasin civilë, përdhunojnë gra, madje hanë dhe qen.
“Është një makth. Tronditja për të gjithë botën janë gjërat që ata bënë. Gjëra të tmerrshme, të tmerrshme. Ata vrasin civilët tanë, fëmijët tanë. Ata përdhunojnë vajzat dhe gratë tona. Ata vrasin qentë tanë dhe madje i hanë. I urrej shumë për atë që i kanë bërë popullit ukrainas. Unë i urrej njerëzit në Rusi që duan të na bindin se kjo është propagandë. Si mund të them diçka të tillë,” tha Zinchenko.
Ai luajti në kampionatin rus për një vit e gjysmë, e tani thotë se rrethi i miqve nga atje është zvogëluar dukshëm.
“Unë kam miq atje, por një rreth që tani është reduktuar pothuajse në asgjë. Jam i zhgënjyer. Njerëzit që njoh më kanë kërkuar falje dhe më kanë thënë se nuk mund të bëjnë asgjë. Sigurisht që munden. Nëse heshtin, sigurisht që përkrahin atë që ndodh. Ata janë të frikësuar nga burgu nëse flasin, por nëse të gjithë deklarohen, sigurisht që nuk do të arrestohen”, shtoi ukrainasi. /tesheshi.com/
