Koordinatori i vëzhguesve të PDK-së në Pejë është dënuar me 700 euro nga gjykata e këtij qyteti për ndikim te votuesit gjatë zgjedhjeve.
Në aktakuzën e prokurorisë thuhet se, “Avdullahu në ditën e zgjedhjeve ishte kapur me 6 fletëvotime, ndërsa i kishte këshilluar votuesit të votonin për subjektin që përfaqësonte.”
“Më datën 11.06.2017, rreth orës 12:30, në Pejë, në Qendrën e Votimit në shkollën fillore “Asdreni”, si person zyrtar dhe në atë si koordinator i vëzhguesve të partisë së PDK-së ka keqpërdorur pozitën, detyrën zyrtare, dhe autoritetin e tij, duke i këshilluar votuesit që të votojnë në favor të partisë së tij,” thuhet më tej në aktakuzë.
Aktakuza më tutje sqaron se Avdullahu kishte dhënë një fletëvotim ku ishte i rrumbullakësuar numri i Koalicionit PAN dhe disa nga kandidatët e tij.
Avdullahu, nëse nuk mund ta paguajë gjobën për tre muaj, do të duhet të shkojë në burg, një ditë e të cilit do t’i llogaritet 20 euro. /tesheshi.com/
