Mbi 50 civilë, mes të cilëve dhe fëmijë, u vranë dje ndërsa raketat goditën pesë spitale dhe dy shkolla në Halep dhe Idlib të Sirisë.
Fuqishëm i ka dënuar sulmet Ministria e Jashtme turke, që ka deklaruar se sulmet ajrore ruse mbi shkollat dhe spitalet përbëjnë krime lufte.
Kanë reaguar po ashtu dhe OKB-ja e Departamenti Amerikan i Shtetit.
Sekretari i përgjithshëm i OKB-së, Ban Ki-Moon, i ka konsideruar sulmet ajrore si shkelje kokë e këmbë të ligjit ndërkombëtar, ndërsa Departamenti i Shtetit ka theksuar se këto veprime hedhin dyshime mbi gatishmërinë dhe aftësinë e Rusisë për të ndihmuar në dhënien fund brutalitetit të regjimit të Esadit ndaj popullit të vet.
Ministri i Jashtëm francez, Jean-Marc Ayrault, tha se sulmet nga regjimi apo mbështetësit e tij ishin të papranueshme dhe duhej të ndalonin menjëherë. Të papranueshme i ka quajtur këto sulme edhe shefja e politikës së jashtme të BE-së, Federica Mogherini. /tesheshi.com/
