Ish-presidenti francez Nicolas Sarkozy u dënua sot në Paris në shkallë të dytë me tre vjet burg, një prej të cilëve pa lirim me kusht, për korrupsion dhe ndikim të padrejtë, një dënim i paprecedentë për një ish-president të vendit.
Për avokatin prej shumë kohësh të Sarkozy-së, Thierry Erzog, dhe ish-gjyqtarin e rangut të lartë Gilbert Azibert, u dhanë të njëjtat dënime.
Gjykata e Apelit gjithashtu i hoqi Sarkozy-së të drejtat e tij politike për tre vjet, duke e ndaluar atë të kandidojë për postin. Ajo gjithashtu e ndaloi Erzogun të ushtronte profesionin e avokatit për tre vjet.
Sarkozy mbërriti në gjykatë i veshur me një kostum gri të errët dhe ishte mjaft nervoz.
Megjithatë, sipas vendimit të Gjykatës së Apelit, Sarkozy do të mund të vuajë dënimin një vjeçar që i ishte caktuar pa lirim me kusht, me byzylyk elektronik dhe pa shkuar në burg.
Avokatja e tij tha menjëherë pas shpalljes së vendimit se ish-presidenti do të apelojë në shkallën e tretë. “Nicolas Sarkozy është i pafajshëm për akuzat kundër tij”, tha avokatja Jacqueline Lafon. “Do të shkojmë deri në fund të procesit gjyqësor, jemi vetëm në fillim të procesit”, shtoi ajo, duke iu referuar një vendimi “të pamundur”.
Më 13 dhjetor, prokuroria kërkoi një dënim me tre vjet burg me kusht për tre të pandehurit – Sarkozy dhe bashkëpunëtorët e tij, të cilët gjithmonë kanë mohuar çdo përfshirje në këtë çështje. Ish-i forti i së djathtës franceze i kundërshtoi akuzat “aq sa mundi” gjatë gjyqit të Gjykatës së Apelit, duke theksuar para audiencës se ai “kurrë nuk ka korruptuar askënd”.
68-vjeçari u bë ish-presidenti i parë i Francës – ai shërbeu në atë pozicion nga viti 2007 deri në vitin 2012 – që u dënua me liri të pezulluar.
Në vitin 2021 Sarkozy u dënua fillimisht me tre vjet burg – dy prej të cilave u pezulluan – për përpjekje për të ndikuar me anë të një gjyqtari në një çështje të vitit 2014 të zbuluar përmes përgjimeve.
Vendimi i sotëm pritej pasi Nicolas Sarkozy do të gjykohet sërish në shkallë të dytë në vjeshtë për një çështje financimi të paligjshëm të fushatës së tij presidenciale 2012 dhe kërcënohet gjithashtu me një gjyq të tretë: prokuroria financiare kërkoi të enjten shkarkimin e tij në lidhje me dyshimet për financimin e Libisë të fushatës së tij presidenciale të vitit 2007.
Kujtojmë se Sarkozy është mik i ngushtë me Ramën dhe, pak vite më parë, ai dhe bashkëshortja Carla Bruni, do vizitonin Butrintin nën shoqërinë e kryeministrit shqiptar. /tesheshi.com/
