Donte të ndërtonte një rrugë që ia kishin kërkuar banorët, një rrugë mes malesh, ku banorët e mbetur aty e shohin si shpëtim për mbijetesë. Por në dëshirën për të bërë mirë, duke e hapur rrugën, ai bëri keq. Dhe kësisoj duhet ta shpaguajë me burg.
Këtë fat ka ish-kryebashkiaku i Fushë Arrëzit, Fran Tuci, i cili është dënuar nga Gjykata e Posaçme Kundër Krimit dhe Korrupsionit me një vit e gjashtë muaj.
Më saktë, ai së bashku me ish-administratorin e njësisë Iballë, Ndoc Marku dhe administratorin e një firme private, Durim Margjekaj, akuzohen për dëmtimin e një pylli, pasi aty do hapnin rrugën e kërkuar nga banorët, ama pa leje, siç pretendohet nga akuza.
Si pasojë, thuhet se ata i shkaktuan shtetit një dëmim prej gati 2,2 milionë euro, duke shpyllëzuar fondin pyjor në pronësi të Bashkisë Fushë-Arrëz. /tesheshi.com/
