Ish-ushtari i Gardës Kombëtare Ajrore të SHBA, Jack Teixeira u dënua me 15 vjet për ndarjen e dokumenteve që përmbanin informacione të klasifikuara ushtarake amerikane në internet.
Teixeira, i cili u arrestua në prill 2023, u deklarua fajtor për akuzat kundër tij.
“Më vjen keq për çdo dëm që kam shkaktuar. E di që mbaj përgjegjësinë e plotë dhe pranoj pasojat,” tha Teixeira në seancën përpara se të lexohej vendimi.
Gjyqtarja e Massachusetts, Indira Talwani njoftoi se 22-vjeçari Teixeira u dënua me 15 vjet burg për rrjedhje të dokumenteve që përmbanin informacion të klasifikuar ushtarak.
Teixeira arriti një marrëveshje me prokurorët në mars dhe pranoi se ai fshehu të dhënat e mbrojtjes kombëtare të SHBA dhe qëllimisht i ndau ato disa herë me përdorues të tjerë në platformën e mediave sociale Discord.
Jack Teixeira, një anëtar i krahut të inteligjencës të Gardës Kombëtare Ajrore të Massachusetts, u arrestua më 14 prill 2023 për postimin e dokumenteve të klasifikuara ushtarake amerikane në internet. Dokumentet e publikuara në internet nga Teixeira, të cilat mbanin stemën e Shtabit të Përgjithshëm të SHBA, përfshinin informacione për dobësitë e mundshme në mbrojtjen e Ukrainës, e cila është në luftë me Rusinë.
Dokumentet thuhet se përfshiin informacion ushtarak dhe aktual për çështje të rëndësishme, duke përfshirë aktivitetet e inteligjencës që lidhen me programet bërthamore të Rusisë, Izraelit, Kanadasë, Koresë së Jugut, Kinës dhe Iranit. Është vënë në dukje se dokumentet e shpërndara në internet Teixeira janë po aq të rëndësishme sa skandali i WikiLeaks i vitit 2010, në të cilin u publikuan dokumente që vërtetojnë krimet e SHBA-së në Irak dhe Afganistan. /tesheshi.com/
