Nga Musa Mustafa
Sot duhej të ishte një ditë e gëzuar për të afërmit e dhjetra viktimave shqiptare të shkaktuara prej Oliver Ivanoviçit, por ja që nuk ndodhi kështu; duke ua lënë atyre dhe një vragë tjetër dhimbjeje, atë prej një vendimi gjygjësor, që dha për serbin vetëm 9 vite burg.
Kështu, lideri dhe themeluesi i formacionit paramilitar serb në veri të Mitrovicës “Rojat e Urës” e politikani më kontravers serb i Kosovës, Oliver Ivanoviç, është dënuar me 9 vite burgim pasi që është shpallur fajtor për krime lufte të kryera ndaj civilëve shqiptarë gjatë vitit 1999 dhe 2000; vendimi ky i dhënë nga Gjykata Themelore në Mitrovicë
Ndërkohë, ai është dënuar për pikën e parë të aktakuzës, ndërsa për veprën e dytë penale, atë që ka të bëjë me nxitje për vrasje të civilëve gjatë 3 dhe 4 shkurtit të vitin 2000 është liruar.
Vendimi i së enjtes ka nxitur reagimin e familjarve të viktimave të cilët janë shprehur të pakënaqur, duke e cilësuar atë si të butë. Sipas tyre, Ivanoviç nuk duhej ta kalonte më jetën në liri për krimet që ka kryer, por pas hekurave; pra duhej të merrte dënim të përjetshëm.
“Kriminelët serbë që udhëhiqeshin nga Oliver Ivanoviç, ekzekutuan 31 shqiptarë në “Rrugën e Kovaçëve” dhe në rrugën që të shpie për në lagjen Bair me 14 prill 1999, e të dënohet me 9 vite burgim, kjo është qesharake”, ka thënë për portalin tesheshi.com Shefqet Pllana, babai i dy djemve të vrarë në këtë masakër.
“Unë dhe familja e ime jemi tërësisht të pa kënaqur me një vendim kaq të butë që i kanë dhënë kriminelit Oliver Ivanoviq”, ka shtuar Pllana duke thënë më tej se për të shpaguar gjakun e dy djemve dhe të vrarëve të tjerë në masakrën e 14 prillit 1999, Ivanoviç është dashur të marr dënimin e përjetshëm.
Ndërsa Shapi Canhasi, të cilit iu vra bashkëshortja natën e 3 dhe 4 shkurtit të vitit 2000, pas vendimit të Gjykatës për lirimin e 4 të dyshuarve për këto vrasje ka theksuar se “gjaku i bashkëshortes sime dhe i të vrarëve të asaj nate pare syve të KFOR-it francez dhe para policisë së UNMIK-ut, shkoi dëm.
“Nuk ka drejtësi” ka thënë Shaipi deri sa po pastronte gurin e varrit të bashkëshortes së tij të varrosur në varrezat e qyteti në Vushtrri.
“Nuk do të ndalem këtu, do të luftojë ende në të gjitha institucione e drejtësisë vendore e ndërkombëtare, derisa vrasësit e bashkëshortes sime të marrin dënimin e merituar”, ka thënë Shaipi thellë i brengosur.
Në rastin e Ivanoviçit, të akuzuar bashkë me të kanë qenë edhe ish-komandanti i MUP-it, koloneli Dragolub Delibashiç, Ilija Vujaçiç dhe Aleksandër Llazoviç, të cilët janë shpallur të pafajshëm nga të gjitha akuzat për vrasje dhe vrasje të rëndë në prill 1999 dhe më 3 shkurt të vitit 2000 në Mitrov
icë.
Sipas aktakuzës më 14 prill 1999, në rrugën “Miladin Popoviq”, që në Mitrovicë njihet si rruga e “Kovaçëve”, tani “Ahmet Selaci”, dhe në rrugën për në Bair, Ivanoviç, duke vepruar si komandant i Stacionit në Mitrovicë në kuadër të MPB të Republikës Federale të Jugosllavisë, urdhëroi një grup të caktuar policësh serbë që të vrasin civilë shqiptare, pra të kryenin masakër, edhe pse të shënjestruarit nuk ishin direkt të përfshirë në luftime.
Viktimat ishin: Avni Abazi, Mehmet Sefari, Isa Mustafa, Xhemshit Smajli, Behxhet Ferizi, Mentor Mehana, Shefki Kosumi, Fatmir Mustafa dhe Skender Paqarada.
Ndërsa pas luftës, më 3 shkurt të vitit 2000 grupe të policëve të MUP-it dhe të “Rojave të Urës” iu bashkuan një grupi spontan të serbëve të Mitrovicës Veriore të cilët hynë në ndërtesat ku jetonin familjet shqiptare, me qëllim të dëbimit apo dhe vrasjes së tyre, siç dhe ndodhi. Këto grupe i vranë personat në vazhdim duke përdorur mjete eksplozive, armë dhe thika.
Viktimat e kësaj ndërhyrje ishin: Nezir Voca, Shqipe Voca, Bashkim Rukeci, Nimon Sejdiu, Nderim Ajeti, Nexhmije Xhaka, Sebiha Abrashi, Remzije Canhasi, Muharrem Sokoli dhe Selime Berisha.
Oliver Ivanoviç u arrestua në janar të vitit 2014, ndërsa ka kaluar 20 muaj në paraburgim deri në shtator të vitit 2015 kur edhe i është caktuar masa e “arrestit shtëpiak”.
Pas shpalljes fajtor dhe dhënies së dënimit prej 9 viteve burgim, Gjykata Themelore në Mitrovicë ka hedhur poshtë kërkesën e prokurorit Romulo Mateus që i dënuari për krime lufte Oliver Ivanoviç të dërgohet në paraburgim e jo në “arrest shtëpiak”, siç ka qenë deri më tani.
Pasi shqyrtoi kërkesën e prokurorit, Trupi Gjykues vendosi që Ivanoviç të qëndrojë në “arrest shtëpiak” derisa aktgjykimi të shpallet i plotfuqishëm.
Mirëpo këtë e ka kundërshtuar avokati i Ivanoviçit, Nebojsha Vllajiç, duke thënë se paraqitja e tij në gjykatë është dëshmi që ai do t’i përgjigjet drejtësisë, andaj edhe duhet të mbesë në “arrest shtëpiak”. Vlajiç, tha se klienti i tij edhe pse e ka pasur parasysh se mund të dënohet edhe me burgim të përjetshëm, është paraqitur në gjykatë. /tesheshi.com/
