Nga Blendi Gashi
Katër vetëvendosësit, Albin Kurti, Albulena Haxhiu, Donika Kadaj-Bujupi dhe Faton Topalli të cilët u shpallën fajtorë për përdorim të gazit në Kuvendin e Kosovës për çka u dënuan me mbi 1 vit burg me kusht, rrezikojnë të humbin mandatin e deputetit në rast se Gjykata e Apelit i vërteton dënimet e shqiptuara nga Gjykata Themelore e Prishtinës, apo nuk i zbut në më pak se 1 vjet burg.
Kushtetuta e Kosovës, por edhe Rregullorja e Punës së Kuvendit, përcaktojnë qartë se deputetët që dënohen me 1 e më shumë vjet burg humbin mandatin e deputetit.
Pika 6 e paragrafit 3 të nenit 70 të Kushtetutës së Republikës së Kosovës përcakton se një deputet e humb mandatin nëse “dënohet me vendim gjyqësor të formës së prerë për vepër penale me një ose më shumë vjet burgim”.
Përcaktim i njëjtë është edhe në Rregulloren e Punës së Kuvendit të Kosovës.
Pika d) e paragrafit 1 të nenit 25 të Rregullores së Punës të Kuvendit të Kosovës përcakton se “deputeti humb mandatin nëse dënohet për një vepër penale me burgim për një periudhë kohore prej një (1) e më shumë vjet”.
As në Kushtetutë e as në Rregulloren e Punës së Kuvendit nuk ka ndonjë përcaktim apo përjashtim që bën dallimin në mes të dënimit me burg efektiv dhe atij me kusht.
Ndaj vendimit të Gjykatës së shkallës së parë, deputetët kanë paralajmëruar se do të ushtrojnë ankesë në Gjykatë të Apelit.
“S’frikësohemi për mandatet”
Deputetet e dënuara të Vetëvendosje-s, Donika Kadaj-Bujupi e Albulena Haxhiu në një konferencë për media të mbajtur të mërkurën kanë deklaraur se nuk frikësohen as nëse do të humbasin mandatin e tyre, në rast se aktgjykimi merr formën e prerë nga Gjykata Supreme.
“Dënimet me kusht nuk na pamundësojnë kandidimin por as nuk na humbin mandatin për shkak se sipas Kushtetutës duhet të jetë denim i formës së prerë për të humbur mandatin e deputetit”, tha Haxhiu.
“Nuk është e çuditshme nëse mundohen t’ua heqin mandatin e deputetit për shkak se në krye të shtetit janë njerëz që kanë kryer krime ordinere që janë dëshmu sipas raporteve ndërkombëtare”, tha deputetja Kadaj-Bujupi.
Ja ç’thotë Kodi Penal për dënimet…
Albert Krasniqi nga Instituti Demokratik i Kosovës (KDI) që merret me mbikëqyrjen e punës së Kuvendit ka bërë të ditur se deputetëve në fjalë nuk u humb mandati i tyre edhe nëse dënimi është në formë të prerë.
“Kodi Penal i Kosovës parasheh tri lloje të dënimeve: kryesore, alternative dhe plotësuese. Në kuadër të llojit të dënimeve kryesore hyn dënimi me burgim, kurse dënimi me kusht hyn në kuadër të lojit të dënimeve alternative.
Kushtetuta parasheh humbjen e mandatit të deputetëve vetëm në rast të dënimit me burgim të formes së prerë. Pra kur ka një dënim të llojit kryesor, jo alternativë”, thotë Krasniqi.
Kujtojmë se Gjykata Themelore e Prishtinës të mërkurën dënoi Albin Kurtin me 1 vjet e 6 muaj burg, Albulena Haxhiun me 1 vjet e 3 muaj, Donika Kadaj-Bujupin me 1 vjet e 6 muaj si dhe Faton Topallin me 1 vjet e 2 muaj burg. /tesheshi.com/
