Lëvizja Vetëvendosje ka lënë anash për një moment përçarjet duke u marrë me dënimin e katër aktivistëve, Frashër Krasniqi, Egzon Haliti, Atdhe Arifi dhe Adea Batusha për sulmin ndaj Kuvendit të Kosoëvs më 4 gusht të vitit 2016.
Deputeti i Vetëvendosjes, Albin Kurti gjatë debatit në seancën plenare tha se nga 2015 deri tash janë arrestuar me mijëra aktivistë të Lëvizjes me qëllime të caktuara politike, duke persekutuar ata.
Ai akuzoi policinë, duke thënë se ajo po hakmerrej ndaj aktivistëve që për 20 muaj po bënin protesta.
“Policia po na dënonte publikisht para kamerave dhe në studio. Dënonte policia jo gjykata. Gjykata bëhej e ashpër sepse policia ishte brutale. Asaj nuk i interesonin faktet dhe provat sepse as policisë nuk i interesonin. Prokuroria ishte hallk formale që lidhet policinë me gjykatën. Gjashtë aktivistet ishin arrestuar nga policia. Policia a kishte bërë gjyqin, ndërsa gjykatësi na bënte policinë. Por, pse po na persekutonte policia? Urdhrat politik ishte shpeshherë shkaku, por kësaj here ishe diçka më shumë. Përtej urdhrit politik. Unë besoj që ishte hakmarrje. Policia po hakmerrej për VV për protestat që i kishim bërë në muajt e fundit. Ajo çka ngjau me 6 aktivistet ishte hakmarrje e policëve ndaj VV-së. Kjo dëshmohet kur forcat elitare anti-terror më 28 nëntor 2016, kishin thyer zyrat e VV-së ku ndërhyrja e forcave elitare anti-terror, rrahën dhe arrestuan shumë aktivist”, tha Kurti.
Ndërsa deputetja po nga VV, Albulena Haxhiu tha se sistemi i drejtësisë në Kosovë është i kapur dhe ky fakt sipas saj është vërtetuar me dënimin prej 21 vitesh, të aktivistëve të kësaj partie.
“Gjithë aktakuza kundër aktivistëve tonë ishte një fazë e ngritur në shpifje. Kryeprokurori i këtij rasti është njeri i klanit Pronto”, tha Haxhiu.
Sipas saj fajtorët kryesor për këtë gjendje në drejtësi janë: Isa Mustafa, Kadri Veseli dhe Hashim Thaçi.
Dardan Molliqaj poashtu deputet i VV-së e ka quajtur të papranueshëm dënimin e aktivistëve të LVV-së për sulmin ndaj Kuvendit. Sipas tij, gjyqtari i rastit, Beqir Kalludra doli kundër vendimit të FBI-së.
“Skandali më të madh në vendimin e e trupit gjykuese është se dekaron në ditën e vendimit që sulmi ndaj Kuvendit e ka kry Egzoni dhe Atdheu. Gjyqtari thotë se këta e kanë kry sulmin ndërsa FBI ndryshe në ekspertizë”, u shpreh ai.
Ai ka thënë se VV nuk po ndërhynë në sistemin e drejtësisë por këtë gjë e bën SHIK-u e Klani “Pronto” përmes telefonave e duke thirrur darka e duke emëruar gjyqtarë.
Ndërsa deputeti i PDK-së, Hajdar Beqa, këtë debat për aktivistët e dënuar të VV-së e quajti tendencë për të krijuar mosbesim në sistemin e drejtësisë.
“Ky debat është tendencë për të ndërhyrë në sistemin e drejtësisë dhe për çudinë time kjo është duke u bërë nga ata që thirren në drejtësi. Si deputetë duhet të jemi të kujdeshshëm se për çfarë çështje të debatojmë, Kuvendi nuk është vend ku diskutohet për drejtësinë”, tha Beqa.
Kurse Milaim Zeka, deputet i NISMA-s tha se kjo seancë nuk e zgjidh problemin.
“Seanca e thirrur nga VV është një seancë politike, por është edhe një seancë që i ngjan ish kryeministrit Hashim Thaci i cili thirrke jo dëshirojmë ta bëjmë ushtrinë… Ne sot me këtë seancë nuk do t’i zgjidhemi problemet , nuk është problem këtu gjyqtari Beqir Kalludra, por është sistemi, për këtë nuk dëshiron as VV me bë ndryshime, as ne deputet tjerë”, tha Zeka.
Në këtë debat nuk kanë marrë pjesë deputetët e LDK-së pasi ata lëshuan seancën në pjesën e parë të ditës pas një mosmarrëveshje që kishin me kryesuesin e seancës Xhavit Haliti rreth një mocioni për emërimin e anëtarëve të Agjencisë së Cilësisë që është në kuadër të Ministrisë së Arsimit.
Përgatiti: Blendi Gashi – tesheshi.com
