Nga Blendi Gashi
Vendimi i Gjykatës Themelore të Prishtinës për të dënuar me 21 vjet burg katër vetëvendosësit të dyshuar për sulmin ndaj Kuvendit të Kosovës, ka befasuar vetëm këta të fundit, por edhe familjarët dhe avokatët.
Duke kanë pritur të lirohen, sidomos nga nga fakti se para tri javësh, më 26 tetor, prokurori i Prokurorisë Speciale, Abdurrahim Islami, tha se “nga ekspertiza e ADN-së, ekspertiza daktiloskopike dhe provat e tjera, nuk ka ndonjë provë që i lidhë direkt të akuzuarit me kryerjen e veprës”.
“Masakër e drejtësisë për të mbuluar vdekjen e Astritit”
Ndërsa gjykatat kosovare me vendimin e marrë i kanë vënë kapakun kësaj çështjeje që sipas tyre e kanë vendosur drejtësinë në vend, mbrojtja e të dënuarve e sheh vendimin si masakër të drejtësisë, me qëllim dhe mbulimin e vdekjes së Astriti Deharit, një ish-aktivist i VV-së, i cili u gjend i vdekur në paraburgim.
Këtë saktësisht e tha pas vendimit Tomë Gashi, avokati i tashmë të dënuarit Frashër Krasniqi (8 vjet burg), por edhe vet të dënuarit e familjarët e tyre.
Avokati Gashi.
“Është non sens juridik se si ky trup gjykues nuk i beson ekspertizave të veta. Kemi të bëjmë me një rast krejtësisht politik. Kjo është një masakër juridike . Është obligim i jonë që të bëjmë ankesë dhe kjo çështje politike mund të rregullohet me trysni politike. Janë shpall fajtorë pa asnjë provë”, tha Gashi.
Ndërsa kryetari i Vetëvendosje-s, Visar Ymeri në një konferencë ka thënë se aktivistët e tyre janë dënuar pa asnjë provë.
“Është vendim politik dhe tregon sa thellë është kapur shteti. Ky vendim nuk sjell drejtësi, por synon ta mbulojë vdekjen e Astritit”, tha Ymeri.
Ndaj vendimit ka reaguar edhe vet i dënuari Frashër Krasniqi i cili përmes një postimi në Facebook i cili ka kundërshtuar ashpër vendimin, duke thënë se nuk mjaftoi asgjë, asnjë dëshmi e paraqitur nga ta, që gjyqtari i rastit Beqir Kalludra t’i dënojë.
“Nuk mjaftoi fakti që ADN-të tona nuk u përputhën me gjurmët nga vendi i ngjarjes.
Nuk mjaftoi fakti që në pajisjet tona elektronike nuk u gjet as një gjë e vetme inkriminuese.
Nuk mjaftoi ekspertiza e FBI që tha se asnjëri prej nesh nuk mund të lidhet me sulmin në Kuvend.
Nuk mjaftuan deklaratat e dëshmitarëve që thanë se asnjërin prej nesh nuk mund ta identifikojnë si pjesëmarrës apo të përfshirë në këtë rast.
Nuk mjaftuan deklaratat e dëshmitarëve që treguan se Policia u ka shtuar deklarata pa dijeninë e tyre.
Nuk mjaftoi përgjigjja e GOOGLE që ishte tërërisht shfajësuese për ne.
Nuk mjaftuan alibitë tona të pakontestueshme mbi vendndodhjet tona në kohën kur ishte kryer sulmi në Kuvend.
Nuk mjaftoi terrorizimi që na e bënë për një vit e gjysëm. Nuk mjaftoi vdekja e Astritit që po mbahej padrejtësisht në burg.
Pikërisht kështu po duan të na e fusin frikën në palcë, sepse e dinë se ku po e qojnë Kosovën. Po duan t’ju thonë qytetarëve se ‘shiheni çka ju bëjmë njerëzve të pafajshëm, e lëre më juve nëse guxoni të ngritni zë kundër nesh’. Dhe jo rastësisht, gjykatësi Beqir Kalludra me ngulm insistonte që ky proces të kryhet para balotazhit. Dy ditë para zgjedhjeve”, shkruan Krasniqi”, thotë vetëvendosësi Krasniqi.
Nëna e të dënuarit Atdhe Arifi: Marre për shtetin, u dënuan pa asnjë provë
Pas dënimit të vetëvendosësve ka reaguar edhe nëna e të dënuarit me gjashtë vjet burgim, Atdhe Arifi.
Ajo shprehu shqetësimin e saj për këtë vendim, duke thënë se këtë rast nuk do e lënë me kaq pasi sipas saj ky vendim është i padrejtë.
“Këtë rast kemi për ta dërguar ku të ketë ligj në këtë botë. Kemi për të kërkuar drejtësi. Nuk ka Kosova fëmijë më të mirë, krenohemi me fëmijët tanë. Atdheun e kam prit ta dërgoj në shkollë e ta fus në punë se e kam shkolluar me shumë sakrifica. Atdheu nuk është i vetëm, as Frashëri, Egzoni e Adea…Pa asnjë dëshmi, marre”, ka reaguar nëna e Atdhe Arifit. /tesheshi.com/
