Pretendimi i Vladimir Putin se Perëndimi dhe Kievi janë fajtorë për luftën në Ukrainë është “absurd”, tha të martën këshilltari i Sigurisë Kombëtare i Shtëpisë së Bardhë, Jake Sullivan, pas fjalimit të parë të presidentit rus në Dumën e Shtetit që nga pushtimi i Ukrainës.
“Askush nuk po sulmon Rusinë. Ka një lloj absurditeti në idenë se Rusia ishte nën një lloj kërcënimi ushtarak nga Ukraina apo dikush tjetër”, u tha ai gazetarëve në Uashington.
Zëdhënësi i Departamentit të Shtetit të SHBA, Ned Price tha të martën se ndikimi i njoftimit të Rusisë se po pezullonte bisedimet për kontrollin e armëve bërthamore ishte i paqartë, ndërsa qëndrimi i SHBA-së për armët bërthamore mbeti i pandryshuar.
Më parë këtë vit, SHBA njoftoi publikisht se Rusia nuk po sillet në përputhje me traktatin e ri START dhe se Uashingtoni do të vëzhgojë se çfarë hapash do të marrë në të vërtetë Moska.
Putini tregoi “irrelevancë dhe konfuzion”
“Është e paqartë nëse do të ketë ndonjë ndikim praktik. Ne ende nuk kemi parë ndonjë arsye për të ndryshuar pozicionin tonë për armët bërthamore, si dhe pozicionin tonë strategjik”, tha Price.
Mihajlo Podoljak, këshilltar i lartë i presidentit ukrainas, tha se fjalimi i presidentit rus “tregoi papërshtatshmërinë dhe konfuzionin e tij”.
“Ai vuri në dukje se RF [Federata Ruse] është në një ‘ngërç’, nuk ka zgjidhje premtuese dhe nuk do të ketë. Sepse kudo ka ‘nazistë, marsianë dhe teori konspirative’”, ka shkruar Podoljak në një postim në Twitter.
Ndërkohë, Oleksandr Sherba, ambasadori i Ukrainës në Austri, akuzoi Putinin si një “gënjeshtar” pasi presidenti rus pretendoi se Perëndimi dhe Kievi ishin fajtorë për luftën.
Meloni: Fjalimi i Putinit ishte propagandë
Kryeministrja italiane Giorgia Meloni e vlerësoi si propagandë fjalimin e presidentit rus në Dumën e Shtetit.
Ajo tha se kishte shpresuar për diçka më konstruktive, raporton Reuters.
“Një pjesë e zemrës sime shpresonte për disa fjalë të ndryshme, një lloj përparimi. Por ishte thjesht propagandë”, tha Meloni, e cila po viziton Ukrainën.
Ministrja e Jashtme gjermane Annalena Baerbock tha se komuniteti botëror i ka bërë vazhdimisht thirrje Putinit që të mos përdorë kërcënime bërthamore në konfliktin me Perëndimin për luftën në Ukrainë.
Po ashtu, Britania e Madhe i bëri thirrje Vladimir Putin të martën që të rishqyrtojë vendimin për pezullimin e Rusisë nga Traktati i Ri START.
“Ne shpresojmë që Putini të mund të rishqyrtojë vendimin e keq-menduar për të pezulluar pjesëmarrjen e Rusisë në marrëveshjen bërthamore”, tha zëdhënësi i kryeministrit britanik Rishi Sunak, sipas Reuters.
Në deklaratën e qeverisë britanike thuhet se kontrolli i armëve është jetik për sigurinë e planetit dhe se vendimi i Putinit është një shembull tjetër që ai rrezikon sigurinë globale për përfitime politike.
Presidenti rus tha se Rusia dëshiron të zgjidhë konfliktin në Ukrainë në mënyrë paqësore, por se vendet perëndimore kanë përgatitur një “skenar të ndryshëm” pas shpine. /tesheshi.com/
