Finalja e Champions League-s është luajtur të shtunën, por jehona e saj vazhdon të jetë e pranishme në opinionin sportiv.
E jo aq për humbjen e Liverpulit, sa për dëmtimin e Mohamed Salah-ut në pjesën e parë, rrjedhojë e një ndërhyrjeje të qendërmbrojtësit të Realit të Madridit, Sergio Ramos-it.
Ka një mendim të përgjithshëm se ndërhyrja e spanjollit ishte e qëllimshme, se mbajtja e krahut të Salah-ut kërkonte ta nxirrte atë jashtë loje, ashtu siç ngjau më pas.
Përpos një reagimi të gjerë, veçanërisht në botën arabe, një peticion i këtyre ditëve kërkon dënimin shembullor të Ramos-it.
I gjendur në adresën elektronike change.org, peticioni është nënshkruar deri këtë pasdite nga më tepër se 371.000 persona.
Në peticion lexohet mes të tjerash se Sergio Ramos e mbajti qëllimisht krahun e Salah-ut, duke i nxjerrë shpatullën.
“Sergio Ramos përfaqëson një shembull të lemerishëm për brezat e ardhshëm të lojtarëve të futbollit. Në vend të fitimit të ndeshjeve ndershmërisht, ai përdor hile që e sfidojnë frymën e ndeshjes dhe të lojës së ndershme. UEFA dhe FIFA duhet të marrin masa kundër Ramos-it dhe lojtarëve të ngjashëm duke përdorur regjistrimet filmike të ndeshjeve për ta ruajtur frymën e lojës,” thuhet në peticion. /tesheshi.com/
