Ish-arbitri gjerman i futbollit, Manuel Grafe, ka ngritur një padi kundër Federatës Gjermane të Futbollit (DFB), e cila e ndaloi atë nga arbitrimi për shkak të kufirit të moshës.
DFB do t’i duhet të paguajë 48.500 euro dëmshpërblim për 49-vjeçarin Grafe, i cili drejtoi 289 ndeshje të Bundesligës nga viti 2004 deri në 2021, por ai nuk do të jetë në gjendje të vazhdojë karrierën e tij të arbitrit, vendosi gjykata në Frankfurt.
Grafe, i cili konsiderohej si një nga gjyqtarët më të njohur në Gjermani, iu desh të përfundonte karrierën e tij pas sezonit të kaluar, sepse DFB nuk i lejon më gjyqtarët mbi moshën 47 vjeç të kryejnë detyrat e tyre.
“Ata hoqën atë që unë dua të bëj. Trupi im është në formë të mirë dhe mund të gjykoja lehtësisht për të paktën disa vite të tjera. Vendimi më shkaktoi edhe dëme të konsiderueshme financiare”, tha Grafe.
FIFA hoqi kufirin e moshës
Edhe pse ai kaloi me sukses të gjitha testet fizike dhe të tjera të nevojshme për të punuar si arbitër në Kategorinë e Parë të Gjermanisë, dhe lojtarë të shumtë dhe punonjës të futbollit i kërkuan federatës gjermane që të bënte një përjashtim dhe t’i lejonte atij të vazhdonte arbitrimin, federata nuk e bëri këtë.
Në vitin 2014, Federata Ndërkombëtare e Futbollit (FIFA) hoqi kufirin e moshës për gjyqtarët në ndeshjet ndërkombëtare. Megjithatë, rregullat e FIFA-s thonë se gjyqtarët mbi moshën 45 vjeç mund t’i nënshtrohen “vlerësimeve teknike shtesë, si dhe ekzaminimeve specifike mjekësore dhe testeve të fitnesit rast pas rasti”. /tesheshi.com/
