“Epidemia më e rrezikshme sot në vend, është mungesa e ilaçeve, sidomos për sëmundjet e rënda, çfarë po vë në rrezik jetën e qytetarëve”, – ka thënë sot deputetja demokrate Albana Vokshi, e cila ka shtua se 340 milionë euro Edi Rama dhe Ilir Beqa i kanë ndarë me miqtë e tyre, ndërkohë që medikamente nuk ka.
Demokratja deklaroi se fondi për shëndetin po vidhet çdo ditë, dhe Ilir Beqaj injoron thirrjet për ndihmë të pacientëve dhe familjarëve të tyre.
“Në spitalin Onkologjik, edhe pas denoncimeve të pacientëve, vizitës së deputeteve te PD të Komisionit Parlamentar të Shëndetësisë, gjendja është katastrofike. Ilaçet mungojnë. tek Infektivi në QSUT, mungon prej javësh çdo preparat për trajtimin e të sëmurëve me HIV-AIDS. Tek Trauma mungon çdo gjë. Akoma më e rëndë është gjendja në spitalet bashkiake dhe rajonale në gjithë Shqipërinë”, – ishin fjalët e Vokshit.
Ajo shtoi se mungesa e ilaçeve është kriza më e madhe që po vuajnë qytetarët, të sëmurët dhe familjarët e tyre, ndërsa bëri me dije se një tjetër shqetësim i madh, është futja e ilaçeve kontrabandë, të pakontrolluar.
“Tregu farmaceutik është kapur nga, “koordinatori i korrupsionit” Beqaj. Partia Demokratike bën përgjegjës për këtë krim Edi Ramën dhe Ilir Beqën. Ndaj i bëjmë përsëri thirrje prokurorisë të përparojë me hetimet për të ndalur këtë krim të tmerrshëm në shëndetësi”, – tha Albana Vokshi. /tesheshi.com/
