Jared Kushner, i martuar me vajzën e Donald Trump-it, do të jetë kryekëshilltari i presidentit të ri në Shtëpinë e Bardhë.
Në një deklaratë të një dite më parë, Trump u shpreh për emërimin e dhëndrit si këshilltar i lartë se qe krenar që do ta kishte atë në një rol kyç udhëheqjeje në administratën e tij.
Kushner ka patur një peshë kyçe në fushatën zgjedhore të Donald Trump-it, si dhe e ka ruajtur pozitën me ndikim dhe në ekipin e tij të tranzicionit.
Emërimi i Kushner-it ka sjellë reagimin e menjëhershëm të demokratëve amerikanë, që kanë kërkuar rishikimin e vendimit. Nepotizmi dhe konflikti i interesit janë argumentet e kundërshtisë ndaj emërimit të dhëndrit të presidentit si këshilltar i tij.
Demokratët në Kongresin Amerikan i kanë kërkuar Departamentit të Drejtësisë të shohë nëse emërimi i shkel ligjet kundër nepotizmit.
Avokatja e Jared Kushner-it ka deklaruar se ai ishte i angazhuar t’u përmbahej ligjeve federale të etikës, e se emërimi nuk binte ndesh me ligjet kundër nepotizmit. Zonjusha Gorelick ka kujtuar se ai nuk do të paguhej për rolin këshillimor.
Një ligj i vitit 1967 i ndalon zyrtarët qeveritarë t’i punësojnë të afërmit e tyre, por nuk është e qartë nëse ai vlen për Shtëpinë e Bardhë. /tesheshi.com/
