Dritan Demiraj, që për 4 muaj mbajti postin e ministrit të Brendshëm pas marrëveshjes së 18 majit mes kryeministrit Edi Rama dhe kreut të PD-së, Lulzim Basha, i ka drejtuar një apel ambasadorëve të vendeve perëndimore të akredituar në vendin tonë që të reagojnë në lidhje me atë që sipas tij po instalon Edi Rama në Shqipëri.
Demiraj i referohet një takimi të presidentit amerikan, Donald Trump, i cili i ka premtuar Kubës ndihmë për të luftuar komunizmin, ndërsa shkruan se kryeministri Rama, persona të këtij sistemi i ka vendosur në poste të larta shtetërore.
“Në një takim për nder të Muajit të Trashgimisë Latine, presidenti Trump i përcolli komunitetit kubanez vendosmërinë e SHBA-se për të luftuar komunizmin dhe mbështetur lirinë dhe Demokracinë në Kubë.
Shqipëria është e kapur sërish nga Komunizmi. Ish-zyrtarë të lartë të diktaturës komuniste janë rikthyer me bekimin e Edi Ramës dhe drejtojnë shtetin.
Edi Rama ‘mban’ yjet e Fidel Castros në xhaketë dhe u rikujton shqiptarëve bunkerët dhe simbolet traumatizuese të regjimit.
Shqiptarët po ikin masivisht si në kohën e ambasadave dhe anijeve famëkeqe te vitit 1990. Krimi po terrorizon qytetet si dikur sigurimi i shtetit dhe ‘agjitacion propaganda’.
Dhjetëra mijëra shqiptarë u burgosën në burgjet komuniste vetëm pse donin lirinë dhe ishin properëndimorë, ndërkohë ambasadorët e shteteve perëndimore heshtin”, shkruan Demiraj në një postim në rrjetet sociale nga Uashingtoni. /tesheshi.com/
