Osman Dembele “me të vetën” është lojtar i Barcelonës, por Borusia e Dordmundit, nuk ka ndërmend ta falë, për ikjen “hajdutshe” që po përpiqet të bëjë.
Pasi nuk është paraqitur në stërvitje dhe klubi nga Ruhri pret shpjegime për të, 20 vjecari francez është “kapur” nga reporterët e gazetës “Bild”, duke “ngarkuar valixhet”, mbase për tu shpërngulur nga Dordmundi në Barcelonë.
Dembele nuk ka qenë pjesë e fazës përgatitore të Borusias dhe fundjavën e shkuar, nuk donte as grumbullimin për ndeshjen e superkupës, duke tentuar të përshpejtojë marrëveshjen mes klubit katalanas dhe atij gjerman.
Por klubi që e ka ende nën kontratë sulmuesin, deklaron se nuk ka ende asnjë tratativë për francezin dhe se shifra për shitjen e tij, luhatet rreth 130 milion euro.
Barcelona nga ana e saj, dëshiron të gjejë tek talenti 20 vjecar, zëvendësuesin e Neymar, shitja e të cilit ia mbushi me 222 milion euro arkën. Megjithatë, siç thuhet shpesh, me gjermanët “nuk duhet kruar” shumë në çështje mardhëniesh, sepse nuk janë edhe aq “elastikë” kur tenton t’ia hedhësh. /tesheshi.com/
