Komisioni për matjen e territorit të Kosovës, thotë se në kuadër të punës së vet ka siguruar edhe tri harta të punuara nga KFOR-i në vitin 2001, kurse, më 13 dhe 14 shkurt, ky komision ka bërë dy vizita në terren me qëllim të verifikimit të mbulueshmërisë së territorit me dokumentacion administrative. Kështu ka thënë për “KosovaPress”, zëdhënësi i këtij komisioni, Tomor Çela. Ai ka shtuar se puna e këtij komisioni është në përfundim të fazës analitike të dokumentacionit.
“Komisioni për matjen e territorit vazhdon punën me dinamikë të njëjtë. Kemi pranuar edhe disa materiale nga përfaqësuesi i FSHMN-së, dhe kemi siguruar 3 harta të punuara nga KFOR-i, në vitin 2001. Sigurisht se do të ketë matje digjitale të të gjitha zonave kadastrale dhe komunave administrative”, ka thënë ai.
Ndryshe, komisioni i ekspertëve për matjen e territorit ka mbajtur takimin e radhës të enjten, ku janë prezantuar materialet dhe gjetjet nga terreni lidhur me verifikimin e segmenteve dhe pikave me të cilat vërtetohet mbulueshmëria me dokumentacion administrativ dhe hartografik.
Mënyra se si Kosova e demarkoi kufirin me Malin e Zi mbetet njëra prej çështjeve më diskutabile në vend.
Krerët e shtetit kanë shtuar presionin duke thënë se kosovarët po vazhdojnë të mbesin të izoluar në Evropë pikërisht për shkak të mos-miratimit të Demarkacionit.
