Presidenti Hashim Thaçi, kryeministri Isa Mustafa, dhe kryetari i komisionit shtetëror për shënjimin e kufirit me Malin e Zi, Murat Meha, në debatin që po mbahet për Demarkacionin, kanë mbrojtur qëndrimet e tyre se Kosova nuk humb asnjë pëllëmbë me marrëveshjen e nënshkruar me Malin e Zi në gusht të vitit 2015-të.
Presidenti, Hashim Thaçi në debatin për demarkacionin ka lexuar pikën e 12 të deklaratës së pavarësisë së Kosovës.
“Shënjimi i kufijve është një nga kriteret kryesore të shtetësisë së Republikës së Kosovës. Kosova duhet të plotësoj këtë kriter dhe të bëjë përkufizim të qartë me të gjitha vendet që kufizohet. Komisioni qeveritar i themeluar në vitin 2012 ka përfunduar punën e shënjimit të vijës kufitare me Malin e Zi, kjo marrëveshje është nënshkruar me 26 gusht 2015 në Vjenë”, ka thënë Thaçi.
Ai ka shtuar se si president i beson hartave të NATO-s dhe jo të ekspertëve jugosllavë.
Mustafa: S’është dëshmuar që vendi ka humbur tokë
Kryeministri, Isa Mustafa, ka thënë se deri më tani nuk është dëshmuar se shqiptarët kanë humbur pronë me marrëveshjen e nënshkruar për demarkimin e kufirit.
“Pas nënshkrimit të marrëveshjes një vit më parë, si kryeministër kam bërë thirrje që të dokumentojnë çdo formë të mundshme nëse ndonjë pronë e tyre, për të cilat është paguar tatim në Kosovë, tani ka kaluar në Malin e Zi. Nuk është dëshmuar asnjë pëllëmbë tokë se ndonjë pronë ka kaluar në Malin e Zi. Ne na obligon pakoja e Ahtisaarit që të kemi kufijtë e vitit 1974”, ka shtuar ai.
Meha: Nuk u dëmtua vendi as edhe një metër katror
Murat Meha, kryetar i komisionit shtetëror për caktimin e vijës kufitare të Kosovës me Malin e Zi, ka thënë se institucioni që ai përfaqëson nuk e ka ndryshuar as edhe një metër katror të territorit.
Meha tha se shënjimi i territorit përbëhet nga tri komponentë dhe ripërsëriti se Komisioni Shtetëror nuk e dëmton Republikën as edhe për një metër katror.
“Komisioni ka kryer detyrën në përputhje me udhëzimin nga Qeveria dhe me përgjegjësi e profesionalizëm. Komisioni ka bashkëpunuar me institucionet relevante të vendit dhe ato lokale – të Pejës, Deçanit, Istogut, Junikut”, ka deklaruar Meha.
Në pjesën e dytë të debatit, faktet se Kosova humb territor do t’i preznatojnë ekspertët e fushës, si dhe do të flasin edhe deputetët e partive opozitare. /tesheshi.com/
