Ndërsa kryekuvendari Kadri Veseli shpresat për kalimin e Demarkacionit i ka tek Vetëvendosje, konkretisht tek deputetët anti-Kurti, presidenti Hashim Thaçi sytë i ka tek votat e Listës Serbe, edhe pse kjo parti dy herë përmes komunikatave ka njoftuar se nuk e voton marrëveshjen në fjalë.
“Shpresoj që partnerët koalicionit janë duke biseduar intensivisht me Listën Serbe dhe kjo çështje të përmbyllet në ditët e ardhshme”, u shpreh Thaçi, në një konferencë për media së bashku me ndihmës sekretarin e Shtetit të SHBA-së për Çështje Evropiane dhe Evroaziatike, Wess Mitchell.
Ai shtoi se askush nuk ka asnjë arsye që të vonojë votimin e Demarkacionit në Kuvendin e Kosovës, pasi tha se është interes strategjik dhe shtetëror.
Për këtë çështje ka folur sot për mediat kosovare edhe nënkryetari i Kuvendit nga LDK, Kujtim Shala, i cili ka deklaruar se “deri më tani nuk kemi marrë ndonjë njoftim nga Administrata e Kuvendit”.
Kujtojmë se prej herës së fundit kur dështoi seanca për Demarkacionin, qeveria u angazhuar që ta bindin Listën Serbe që ta votojë ratifikimin e kësaj marrëveshje e cila është kusht për liberalizmin e vizave, pasi kryeministri Haradinaj, zv.kryeministri Behgjet Pacolli e deputet të LDK-së dështuan të bindin krahun anti-Kurti, si deputetët Visar Ymeri, Dardan Molliqaj, Dardan Sejdiu etj të japin votën pro.
Përveç Listë Serbe dhe Vetëvendosjes, votën kundër Demarkacionit e ka deklaruar edhe deputeti i PDK-së Nait Hasani. /tesheshi.com/
