Nga Blendi Gashi
Kryeministri Isa Mustafa të premten e javës së kaluar i dha fjalën zv.ndihmës sekretarit amerikan Hoyt Yee se qeveria do e riprocedonte në Kuvend ditën e sotme, marrëveshjen për demarkimin e kufirit me Malin e Zi.
Por, Mustafa nuk ka arritur të mbajë fjalën, pasi në momentin e fundit ka marrë një shuplakë të papritur nga Kadri Veseli. Ndërsa ministrat e LDK-së në ora 10:00 të buzëqeshur hynë në sallën e mbledhjeve të qeverisë, rrugën e tyre nuk e ka ndjekur asnjë nga ministrat e PDK-së, pasi asnjë prej tyre nuk është paraqitur në sallë, me gjasë të urdhëruar nga kreu i tyre.
Pas disa minuta pritjeje, gjegjësisht afër 30 minuta, ministrat e LDK-së janë larguar nga salla e qeverisë, pasi kanë kuptuar se mbledhja nuk do mbahet. Të njëjtit më pas janë drejtuar tek zyrat e LDK-së ku Mustafa ka mbledhur anëtarët e kryesisë së partisë, ku kanë diskutuar për situatën e krijuar.
Zëdhënësi i qeverisë Arban Abrashi, pas takimit ka njoftuar se Demarkacioni do riprocedohet pas ditës së mërkurë, pra pas mocionit opozitar për rrëzimin e qeverisë, duke u shprehur i bindur se mocioni në fjalë nuk do kalojë. Edhe qeveria përmes një kumtese është deklaruar me ç’rast ka thënë se “pas diskutimeve të partnerëve të koalicionit qeverisës PDK-LDK, ku ishin të pranishëm edhe përfaqësuesit e Shteteve të Bashkuara të Amerikës, u arrit dakordimi që mbledhja e kabinetit qeveritar ku do të shqyrtohet projektligji për ratifikimin e marrëveshjes për kufirin shtetëror ndërmjet Kosovës dhe Malit të Zi, të mbahet pas seancës së Kuvendit, që do të zhvillohet të mërkurën”.
Ja e vërteta pse dështoi mbledhja e qeverisë
Portali tesheshi.com nga burimet e veta brenda koalicionit qeverisës ka kuptuar se arsyeja e dështimit të sotëm të riprocedimit të Demarkacionit nuk ka të bëjë fare me mocionin opozitar, pasi që Mustafa veç e ka ditur se seanca për mocionin është caktuar për të mërkurën.
Arsye kryesore pse sot PDK e bojkotoi keq Mustafën është se ky i fundit paraprakisht nuk e ka njoftuar Veselin se qeveria do vendos ta procedojë Demarkacionin në Kuvend.
“Isa Mustafa ka marrë vendim krye në vete, pra pa u konsultuar me Veselin që të hënën (sot) ta riprocedojë marrëveshjen për Demarkacionin në Kuvend. Kjo gjë sigurisht se nuk është pritur mire nga Veseli i cili ka urdhëruar ministrat e PDK-së që fare të mos paraqiten në mbledhjen e qeverisë dhe të dështojë mbledhja.
Mustafa është munduar të luajë një lojë dhe me lojë ia ktheu edhe PDK, pra bëri që Mustafa të dështojë ta riprocedojë marrëveshjen”, tregon burimi.
Kërkesat e Veselit për Mustafën dhe bashkëpartiakët
Portali ynë meson se arsyeja tjetër është se Veseli gjatë takimit të sotëm “kokë me kokë” me Mustafën ka kërkuar nga ai garanci të plotë që deputetët e tij e japin votën “pro” Demarkacionit, në të kundërtën i ka thënë se ministrat e PDK-së s’do japin votën në qeveri.
“Veseli ka kërkuar nga Mustafa 33 nënshkrime të deputetëve të LDK-së, si një lloj garancie se Demarkacioni do të votohet kur të hidhet në votim. Në këtë mënyrë ministrat e PDK-së do të jepnin mbështetjen e tyre në qeveri që Demarkacioni të shkojë në Kuvend. Ndërkohë, Veseli ka thënë se edhe ai do t’i deponojë 36 nënshkrimet e deputetëve të tij”, tregon burimi.
Ndërsa, burime brenda PDK-së kanë bërë të ditur për portalin tonë se Veseli ka kërkuar nga ministrat dhe deputetët e tij që gjatë kësaj jave të mos lëvizin jashtë shtetit.
“Po kryetari Veseli ka kërkuar nga deputetët dhe ministrat të mos udhëtojnë jashtë vendit. Mund të ndodhë që brenda ditës të lëvizin gjërat dhe ata duhet të jenë të gatshëm”, ka thënë burimi.
Ndryshe, kjo javë padiskutim se do jetë përcaktuese si për fatin e Demarkacionit ashtu edhe të koalicionit qeverisës, pasi ditën e mërkurë Kuvendi do mblidhet ku në rend dite do jetë mocioni opozitar për rrëzimin e qeverisë. /tesheshi.com/
