Këtë të mërkurë, në Kuvendin e Kosovës shkon për ratifikim Demarkacioni me Malin e Zi. Kjo është vendosur së fundi nga qeveria “Mustafa”, pavarësisht kundërshtimeve dhe apelimeve të opozitës për të mos e ndërmarrë këtë veprim.
Demarkacioni është bërë çështja më e mprehtë e ditës në politikën kosovare. Pretendimet janë që Kosova po i fal territor nga i vet, Malit të Zi.
Ndërkohë, herëpashere, specialist fushë kanë publikur në media harta apo dokumenta të cilat denoncojnë gabimet që janë bërë në marrëveshjen per Demarkacionin, edhe ajo e nënshkruar në Bruksel afro një vit më parë.
Por nga ana tjetër, ndërkombëtarët duan që kjo çështje të marrë fund sa më parë, sidomos Brukseli, që ka kushtëzuar edhe “vizat” e shumëpritura për këtë qëllim.
Por opozita nuk e ka pranuar që të shpërblehet me këtë “dhuratë” dhe ka paralajmëruar se do e kundërshtojë ratifikimin e Demarkacionit me çdo mënyrë. /tesheshi.com/
